Arnanut ilinniarfik ammaqqilerpoq

Arnat ilinniarfiat Sisimiuniissaaq Knud Rasmussenillu Højskoleata ataani inissisimassalluni. Ammerineq, amernik mersorneq kalaallisuuliornerlu ilinniarneqarsinnaanngussasut, Knud Rasmussenip Højskoleani, pisortaq Jakob Møller Lyberth oqarpoq.

- Arnat Iliniarfiat kiisami ammaqqilermat ilumoorpoq. Naalakkersuisut peqatigalugit ilinniarfimmik misiligutitut aallartitsivugut, taannalu inuussutissasiutitigut ilinniartitaanertut ingerlassaaq. Arnat Ilinniarfiat højskolenut ilaammat marloqiusamik ingerlatsissaagut, Jakob Møller Lyberth unnersiorluni oqarpoq. Knud Rasmussenip Højskoleani aamma Arnat Ilinniarfianni atuartut immikkoorlutik atuartinneqartassapput.

Højskolemi ilinniartitsisutut sulisooreersut atuartitsinermi atornerisa saniatigut atuartitsisussatut piukkunnartut illoqarfimmi najugallit timerlæreriusassapput.

Ilinnialersussat qulit missaanniissapput, ilinniarfissami ineeqqat arfinillit marlunnit inigineqarsinnaasut pigineqarput.

- Meerartalimmik ilinniartoqalissappat aamma illoqarfimmi inissarsiuunneqarsinnaassapput, Jakob Møller Lyberth oqarpoq.

- Ilinniarneq una misiligutaavoq, ukiuni marlunni ingerlasussaq. Suli ilinniarnerup sivisussusissaa qulakkiivinneqanngilaq, sivikinnerpaamilli ukioq ataasiussaaq.

Jakob Møller Lyberth aamma oqarpoq atisanik ilusilersuisartunngorniarfimmik aallartitsinissamut kalaallisuut qanoq suliarineqartarnerannik ilinniarfik aallarniutaassasoq. Ilinniarfimmut ulloq qinnuteqarfissaq kingulleq tassaavoq tallimanngorneq januaarip ulluisa 15-iat.