Arnanik persuttaasarneq akiorniarpaat

Ullumikkut ulloq tassaavoq FN-ip nunarsuaq tamakkerlugu arnanik persuttaasarneq akiorniarlugu ulloritittagaa.

Tamanna nunatsinni ingerlaaqatigiittoqarneratigut malunnartinniarneqarportaq.

Inge Olsvig Brandt ingerlaaqatigiinnermut aaqqissueqataavoq, taassumallu oqaasii malissagaanni persuttaasarneq naliginnaavallaalersimavoq, iliuuseqartoqartariaqartorlu ujartorlugu:

- Ajornartorsiutini suna annerpaajunersoq oqaatigissaanngilara, kisianni persuttaasarneq annertoorujussuartut isigivarput, ajoraluartumillu naliginnaavallaartutut isigineqarpoq. Angutaagaluaruni arnaagaluaruniluunniit persuttaasarneq naliginnaavallaarpoq. Eqqarsartariaaseq taanna allanngortinniarparput, Inge Olsvig Brandt oqarpoq.

Arnallu qimaaffissaqarnissaannut periarfissat pitsaanerulertariaqartoq ingerlaaqatigiinnermi oqariartuutinut ilaavoq:

- Arnat taamatut misigisaqartut oqinnerusumik ajunnginnerusumillu qimaaffissaanik periarfissiisoqassasoq ullumikkut oqariartuutigaarput, Inge Olsvig Brandt oqarpoq, nangillunilu:

- Telefonikkut imaluunniit ornigulluni oqaloqatiginnilluni arnat saaffiginniffigisinnaasaannik pilersitsisoqarnissaa suliniutigineqarnissaa kissaatiginartorujussuuvoq, Inge Olsvig Brandt oqarpoq.