Arnanik persuttaasarneq akiorniarlugu ulloq nalliussineqarpoq

Ulloq iluatsillugu Saaffiginnittarfiit Qimarnguiillu Kattuffiata kaammattuutigaa unnugu igalaani naneruusernissaq.

Ulloq sinerissami sumiiffinni arlalippassuarni malunnartinniarneqarpoq.

Nuummi Peqqissaanermik Ilinniarfimmi, tarnip pissusaanik ilisimasallit oqalugiartinneqarput. Karen Ghoula Margit Holmgårdilu Danmarkimi Mødrehjælpemeersut, anaanat siunnersorneqartarfianneersut meeqqat ilaqutariinni persuttaaffiusartuni qanoq eqqugaatigisarnerat pillugu oqalugiarput.

Naligiissitaanerulernissamik suleqatigiiffik 8. marts gruppen-mik imminnut taasut aaqqissuisuupput. Persuttaanernik nalunaarutit nunatsinni Danmarkiminngaanniit arfineq-marloriaammik amerlanerupput, Savalimmiuniillu nalunaarutaasartunit qulingiluariaammik amerlanerullutik.

Meeqqat inuusuttullu sianerlutik siunnersorneqartarfianni aamma tarnikkut timikkullu persuttagaasartut saffiginnissutit amerlanersarisarpaat.

Innuttaasut peqqissusaannik misissuisarfiup kisitsisaatai malillugit nunatsinni arnat sisamaagaangata ataaseq inooqatiminit persuttarneqarsimasarpoq.

Persuttagaanermik eqqugaasut, Paarisap meeqqanut inuusuttunullu sianernikkut siunnersorneqartarfiannut 134-mut sianersinnaapput, unnukkut arfineq-marluniit qulingiluanut. Inersimasut aamma sianersinnaapput Ilaqutariissutsimut pisortaqarfiup ilaqutariinnut siunnersuisarfianut 31 41 51-imut marlunngornerni unnukkut arfineq-marluniit qulingiluanut aamma sisamanngornerni ualikkut pingasuniit tallimanut ammasartumut.