Arnanik atornerluinermut akerlioqqusineq USA-mi eqqarsartitsilerpoq
Arnat nunarsuarmi atortittartorpassuit atugaat iluarinagit, nunani avannarlerni killerni inatsisartuni ilaasortat arnat, arsarluni nunarsuarmi pissartanngorniunnernut akerliussutsimik takutitseqqusillutik sapaatip-akunnerata naanerani kajumissaaripput.
Akerliuniarnermut USA-mi naalakkersuisut maanna aamma akuliupput. Nalunaarusiami nutaami saqqummiunneqarpoq Tysklandimut pisartanngorniuffiusussamut inunnik anngiortumik nioqquteqartarnerit amerlisimasut. tamanna USA-mi naalakkersuisunit toqqaserluutigineqalerpoq.
Berlinimi atortitarfiutillip isertuunnagu oqaluttuaraa sapaatip-akunnerini tulliuttuni isertitani amerliarujussuangatikkini. Angut taanna atortittarfiuteqarpoq 40-nik initalinnik ulluinnarnilu angutit 130-t missaanniittut atortittarfimmukartarput.
Nunarsuarmi isikkamik arsaalluni unammersuarnerit nalaanni angutit orniguttartut pingasoriaatinngornissat taasssuma ilimagaa.
Nunarsuarmi isikkamik arsaalluni unammersuarnissat sioqqullugit arnat 40.000-t missaanniittut Ruslandiusimasumeersut Tysklandimiissangatinneqarput. Arnallu taakku amerlanersaat pinerluttoqatigiinnit uukapaatinneqarlutik aningaasarsiutigipilunneqartussanngorlugit tappavunngartinneqarsimapput.
Anngiortumik arnat meeqqallu atortittartuutiginiarlugit nunarsuarmi nioqqutaasartut ukiumut 800.000-t missaanniittut USA-p nunanut allanut ministeriaqarfiup nalunaarusiaani nutaami atuarneqarsinnaavoq.
- Pissaqannginnerusunik uukapaatitsilluni pinngitsaaliillunilu aningaasarsiutiginninneruvoq, USA-mi nunanut allanut ministeri oqarpoq.
Tysklandimi atortittartuuneq atortittartuuteqarnerlu inerteqqutaanngillat. Tysklandimi naalakkersuisut inunnik anngiortumik nioqquteqarneq akuersaarsinnaannginnamikku iliuuseqarniarput.
Nunarsuarmi isikkamik arsaalluni unammersuarnerup nalaani anngiortumik inunnik amerlanerusunik nioqquteqalernissaq ilimanartoq, USA-p nunanut allanut ministeqarfiata nalunaarusiaani atuarneqarsinnaavoq. USA-llu Tysklandi kajumissaarpaa arlaannik iliuuseqaqqullugu.
