Naaja Nathanielsenip politikikkut suliaqarnermini politikkillu avataani kinguaassiutitigut innimiilliornerit nalaassimavai. Ileqqulersuutaasartut isornartorsiorpai allallu naaggaarnissaannik kaammattuuteqarfigalugit.Assi: Angu Motzfeldt

Arnani politikkimik suliaqartunut oqaaserineqartartut: Nulupajui!

Inatsisartuni partiini aamma allani kinguaassiutitigut innimiilliortoqartarpoq. Arnap politikeriusimasup tamanna oqaluttuaraa, innimiilliortoqartarunnaarnissaalu taassuma kissaatigaa.

Inatsisartuni ilaasortaasimasup, Naaja Nathanielsenip pisut nalaanni aningaasanut inatsit pillugu suleqatini anguterpaaluit ataatsimeeqatigigaraluarpai.

Aningaasanulli inatsit ukkatarineqanngilaq. Saqqummiussinermilu apeqquteqarnissamut politikkikkut gruppimi siuttumit oqaaseqaat ataasiinnaavoq:

- Qarlinni taakkunani nulugittutit.

Taama oqaaseqarneq Naaja Nathanielsenip kanngusuummissutigalugu nikanarsaarerpasinneratut tiguaa.

AAMMA ATUARUK Nikanarsagaallutik tiingaffigineqartut: Nipangersimaannarasi kisimiinngilasi

- Pisoqarnerani tassani tamanna tassunga tunnganngitsoq oqaatigigunarpara, ingerlallungalu. Kisianni ajussutigeqaara kingornalu sunnerteqqangaatsiarlunga.

Naaja Nathanielsen politikkimi 2016-imi suliunnaarpoq, tamannalu inuunermini pissutsinik pissuteqarnerarpaa. Naajap pisimasoq facebookikkut allagaqarluni nassuiaatigaa arnallu suliat assingusut pillugit saqqummertut tapersersorlugit oqaatigalugu.

Ataatsimillu pissuteqarluni taamaasiorpoq, tassa ileqquusut kinguaassiutitigut innimiilliornerit – partiini, politikikkut imaluunniit inuiaqatigiinni naliginnaasumik akuersaarneqaannarnerannik allannguerusuppoq.

Arnat: Inatsisartuni arnanik asissuisoqartoq

Naaja Nathanielsen politikkikkut sulinermi kisimi taama nalaataqarsimanngilaq.

Siumumi arnat qulit, ilaatigut Aki-Matilda Høegh Damip aamma Paninnguaq Heilmannip partiip allattaanerisimasaa, Mikael Petersen kinguaassiutitigut innimiilliorsimasutut unnerluutigaat.

KNR-ip arnat qassiusut nunatsinni politikkikkut suliaqartut suliaqarsimasulluunniit allat aamma oqaloqatigai, taakkua Nuummi partiit allaffeqarfiini pissutsit, suiaassusermik aallaaveqartumik oqaaseqartarnerit pissusilersuutillu takussaagajuttut oqaluttuaraat.

Arnat KNR-ip oqaloqatigisimasaasa atertik saqqummersikkusunngilaat, Inatsisartulli isersimaartarfianni ”unngersap ataanittut” pillugit oqaloqatigiittoqangaatsiartartoq arnanillu nikanarsaarerpaluttumik quisaaruteqartoqartarnera nassuiaatigaat.

AAMMA ATUARUK MIO om sexchikane: Vigtigt for børn, at Siumut-kvinder står frem

Taakku arnatut politikeritut atorfilittulluunniit isikkoq, aappariinneq piginnaasalluunniit pillugit oqaaseqartunik tusagaqarnianngikkunik qanoq ersaritsigisumik oqartariaqartarnerat oqaluttuaraat – tassa arnat angutit akornanni akissuteqaraangamik suiaassusermilluunniit aallaaveqartumik oqaaseqartoqaqqusinngikkaangamik qanoq asissugaasartiginerat imaluunniit inussiarniippaluttumik ilassineqartalertarnerat oqaatigaat.

Arnat KNR-ip oqaloqatigisai timikkut kanngutsaatsuliorfigineqarsimanngillat. Tamarmilli oqaaseqarnerisa partiit akornanni kinguaassiutitigut innimiilliortoqartarnerarpaat.

Arnat ilaasa ileqqut ukiuni kingullerni pitsanngoriartorsimanerarpaat, ilaasali ukiorpassuarni allanngorsimannginnerarpaat tamannalu ”itsarnisarpalaartutut” ”qangarnisarpaluututullu” nassuiaatigaat.

Naaja Nathanielsen: Kinguaarinni utoqqartaasuni ajornartorsiutaangaatsiartoq

Naaja Nathanielsenip kinguaassiutitigut innimiilliornerit qassiiusut – Inatsisartuni Inatsisartullu avataanni nalaassimavai. Kisianni, oqarpoq.

- Politikkikkut partiini ajornartorsiutaaginnanngilaq. Tamanna politikkikkut sulinermiinnaq pisanngilaq.

- Inuiaqatigiinni nalinginnaasumik arnarpassuit kissaatiginngisaminnik oqarfigineqartarlutillu attuuaneqartarnerat ajornartorsiutaavoq. Tamanna uatsinnut nuanninngitsumik inissiisarpoq.

Taassuma isigisai naapertorlugit kinguaariinni utoqqartaasut akornanni kinguaassiutitigut innimiilliornernik pisoqarnerusarpoq.

AAMMA ATUARUK Aki-Matilda Høegh-Dam: Mikael Petersenimit inniminniilliorfiusunut ilaavunga

 

- Uanga nammineq nalinniittuni nukarliusunilu ataatsimut isigalugu ajunngitsumik qaninniarnerit naliginnaasut pissusilersuutillu killissamik qaangiisut  assigiinngissussaat takusinnaalluarpaat.

Naaja Nathanielsenip erseqqisarpaa, qaninniarnerit iliuutsillu illuatungeriit tamarmik akuerisinnaasaannik atorneqarpata ’ajunngillat’. Taamaammat arnat saqqummertut kinguaassiutitigullu innimiilliornernik akuersinngitsut aamma nersualaarpai.

- Taamaalillunga arnat uku suminngaanneeraluarunilluunniit maanna ataatsimoorlutik saqqummerlutik pissusilersuummik matuminnga akuersinnginnermik oqaaatiginnittut nuannaarutigeqaakka, Naaja Nathanielsen oqarpoq.

KNR-ip Inatsisartut siulittaasuat, Vivian Motzfeldt oqaaseqartinniaraluarpaa, taannali oqaaseqarusunngilaq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat