Nutarterneqarpoq: 29.06.2010, nal.: 10:10
Taamaasilluni Nuup Eqqartuussiviata eqqartuussutaa ukiumik ataatsimik sivikillineqarpoq. Toqutsineq pivoq Nuummi siorna apriilip qaammataani angutip angerlarsimaffiani. Aviisip JydskeVestkystenip nittartakkamini tamanna allaaseraa.
Aappariit internetikkut imminnut nassaaripput, Danmarkimilu aallaqqaammut najugaqarlutik. Kalaallit Nunaannut ukiup ataatsip matuma siorna nuupput, sapaatip akunnialunnguilu qaangiutiinnartut Tommy Møllerip arnaq toquppaa.
Arnap angutaatigisimasani Tommy Møller ersigisorujussuusimavaa. Ullormi toqquvimmini ilaquttani kalerrissimavai, utinngitsuussagaluaruni politiit attaveqarfigissagaat.
- Uanga pisinnaanngikkukku, allat aamma pissanngilaat, Tommy Møller, 42-nik ukiulik Nunatta Eqqartuussiviani ilaatigut taama tunngavilersuivoq.
Eqqartuussutip nalunaarutigineqarnerani eqqartuussisuuneq Søren Søndergaard Hansen ima oqarpoq:
- Kalaallit Nunaanni toqutsisoqaraangat, toqutsisoq ukiuni tallimani pineqaatissinneqartarpoq. Pineqaatissinneqartup arnaq ilisimajunnaareersoq minutsip affaata missaani toqqusasseqqaannavissimavaa. Aamma toqoreeraluartoq toqqusasseqqissimallugu, taamaammat pineqaatissinneqarnera sukannernerulerpoq.
Toqutsinerminut atatillugu ukiuni tallimani pineqaatissinneqarnera ukiumik ataatsimik sivitsorneqarpoq, arnamummi siusinnerusukkut peqqarniisaarsimavoq, politiit taamanikkut akuliuttariaqarsimallutik.