Arlallit sapaatip akunneranut akunnerni 37-ni sulisalersinnaaneq taperseraat: Meerartagut katattarpagut

​Savalimmiunimi sapaatip akunneranut piffissaq suliffiusoq akunnernit 40-iniit 37-inut sivikillineqarnissaa sulissutigineqassasoq naalakkersuisoqatigiit isumaqatigiissutigaat.

Demokraatineersoq Anna Wangenheim piffissap suliffiusup sivikillineqarsinnaanissaanut aamma tapersiivoq.

- Soqutiginartorujussuuvoq, kissaatiginaqaarlu maani nunatsinni taamatut oqallissinnaasuugaluarutta atorfillit kattuffii, sulisitsisut suliassaqarfiit tamarmik akimorlugit oqallinnermut uunga sinaakkuserluarneqarsimasumik pitsaaqutissartai kingunerisinnaasaalu eqqartorluarneqarnissaat, Anna Wangenheim oqarpoq.

Nuummi inuit ilaasa piffissap suliffiusartup sivikillineqasappat iluaraat, ilaalli aamma ullumikkutut itsillugu ajoriffissaqartinngilaat.

Emilie Olsenip sulisarneri nikerartarput, ilaatigut ullukkut sulisarpoq ullulli allat unnukkortarluni. Qitornani peroreeraluartut, sulinermi akunnerit pingasunik ilanngassappata tamanut iluaqutaasinnaasoq, taanna isumaqarpoq.

- Assorujorujussuaq tapersersorpara.

- Isumaq tulluarpoq ilaqutariit kikkuugaluartut sulisartut eqqussavai nuannersumik ilaqutariinneq ataatsimoorfik piffissaqarfigineqarneq, tamakku tamarmik eqqugaasussaapput, taanna oqarpoq.

Sulisartut sulisarnerat akunnernut 37-inut sivikillineqassappata nalimmassaasoqarumaartoq, Emilie Olsenip naatsorsuutigaa.

- Uanga nikerartumik suliffeqarpunga, taamaammat aamma tamakku eqqarsaatigineqassasut naatsorsuutigaara. Allannguisoqartariaqassaaq, taanna oqarpoq.

Sapaatip akunneranut piffissaq suliffiusoq sivikillineqassappat, naammassisakinnerusoqalersinnaanera inuillu aningaasaqarnerannut eqquisinnaanera aarleqqutigineqartunut ilaapput.

Akunnerit suliffiusartut ikilippata sulisartutut aningaasatigut akisunerulernissaa, Emilie Olsenip pingaarnerusorinngilaa.

- Soorunami aningaasanik nikittoqassaaq, annaasaqarsinnaavugut kisianni aamma ajunngitsortaanut pilluni ajunngitsumik kinguneqarsinnaasoq takorloorpara, taanna oqarpoq nangillunilu:

- Massakkut eqqaasinnaavara angajoqqaat sulinerujussuisa inuiaqatigiit sulinerujussuisa eqqugaat eqqortagaat annertupput. Kikkuugaluaruttaluunniit. Meerartagut ilaatigut katattarpagut.

Akunnerit suliffiusartut ikilissagaluarpata assigiinngitsorpassuartigut aamma iluaqutitaqassasoq, Arnarissoq Fleischer isumaqarpoq.

- Tunngaviatigut tapersersornartorujussuuvoq.

Akunnerilli suliffiusartut ikilissappata kingunerlussinnaanera, Arnarissoq Fleischerip aarleqqutigaa.

- Suliffeqarfiit ilaat imaattaramik akunnerup affaani suliffeqarfiup immaqa akiligaanik ulloqeqqartarlutik. Ilaa, taava nammineq akilertalissavaat? Pilliutitassaqanngippat taamannak, soorlu ulloqeqqartarnersi nammineq akilertalissavarsi. Tapersersornartorujussuuvoq, Arnarissoq Fleischer oqarpoq.

Akunnerilli suliffiusartut ikilissagaluarpata assigiinngitsorpassuartigut aamma iluaqutitaqassasoq, taanna isumaqarpoq.

- Takorloorsinnaavara mikisunik meeraqarluni qanoq iluartigissanersoq immaqa tallimanngornikkut soraajaarsinnaalluni meeqqat aajaarlugit piffissaqarfigilaarlugit qasuersaaqatiginerulaarlugit taamatut nukissaqarfigalugit. Pitsaassagaluaqaaq.

Aammali sulisussaaleqineq tusartuartarparput. Sulinermi akunnerit ikiliniarneri ilumut inissaminiivippa?

- Imaasinnaavoq inunnut aamma killormut soorlu sunniuteqartoq. Sulinikinnerulerunik immaqa sulerusunnerulersut. Tassami taamaattoqarsinnaavoq, Arnarissoq Fleischer oqarpoq.

Allatulli aamma isumaqartoqarpoq. Katja Bjørn Nuummi atisaarniarfiit ilaanni sulisarpoq. Sapaatip akunneranut akunnerit 40-t sulisarpoq, taakkulu appartinnissaat pisariaqarsorinngilaa.

- Isumaqarpunga pisariaqanngitsoq appartinnissai. Massakkut naammagivara ajorinagulu sulinera, taanna oqarpoq.

Katja Bjørn sapaatip akunneranut akunnerit 40-t sulisarpoq suliassaarunnerlu ajorluni. Taamaammat akunnerit 40-t sulisarnini ajoriffissaqartinngilaa.

- Qasunarsinnaasarpoq, kisianni ajunngilaq, ajorinngilara. Naammagivara.

Isumaginninnermut, Suliffeqarnermut Nunamullu Namminermut Naalakkersuisoq, Jess Svane tamanna qanoq isumaqarfigineraa aperaarput.

- Soqutiginarpoq, aamma Naalakkersuisuni soqutiginartereerparput. Naalakkersuisuini aamma pingaartitaraarput sullivinni toqqissisimalluni avatangiisigissaarlunilu sulineq ingerlattuarneqassasoq.