Arlallit nuuttariaqalersinnaapput

Nuunu Larsen, Aasianni initaarnissamut ukiup affaa utaqqereerluni illuinnarmut nuliani meeqqatillu marluk apriilimi nuunnertik nuannarigaluaqalugu nuuttariaqalersinnaapput. Inissiaatileqatigiiffik INI-mit ippassaq allagarsiatik tupassutigeqaat.

- Ippassaq ualikkut tallimat qeqqata missaani allagarsigatta illu qaffaaffiginiaraat 2.463 koruuninik ukioq nutaamiit aallartittumik. Tupaallannarami taama atsigisumik ataatsikkut qaffaassuteqarniartut, 55 procentingajannik inigisarput akitsortussaagami, Nuunu Larsen nassuiaavoq.

Ilaqutariit illu apriilip aallaqqaataani iserterfigaat.

- Nooqqaaratta assut iluarusuppugut, ukiup affaa vakanternikuulluta initaaratta nuannaralugulu massakkut pigaluarlugu, kisianni taama atsigisumik qaffaasoqarnissaa kialluunniit attartortup akuerisinnaanngilaa, oqarpoq.

Nuunu Larsen aappanilu marlunnik atuartuusunik meeraqarput. Januaarimiit qaammammut illumut 6.946 koruuneertalernissamik saniatigut solarimut qaammammut 4-500 liiterimut 2.300 koruuneertassapput aamma imermut innaallagissamullu 1.300 koruuneertassallutik. Tamannalu ilaqutariit nammassinnaanngilaat.

- Soorunami saniatigut aamma akilersugaqaratta, soorlu telefonimut. Taakku ilanngunnagit qaammammut annertungaatsiartumik akiliisarpugut. Inigisarput qimattariaqassavarput akissaqartinngilarput taama akisutigisoq, Nuunu Larsen oqarpoq.

Kenneth T. Hansen, Inissiaatileqatigiiffimmi aqutsinermut pisortaq, aperaarput sooq maanna akinik qaffaasoqalernersoq.

- Soorunami qaffaanermut pissuteqarpugut. Siulleq tassaavoq aserfatsaaliineq pitsaasoq anguneqassappat attartornermut akinik qaffaasariaqarnerput. Aappaa tassaavoq illunik attartornermi akit inissiarsuarmi ininik attartornermut akinut qanillattornissaanik aalajangersagaq. Akinilli qaffaaneq illunik attartortunik nuuttariaqalersitsissanersoq ilisimanngilara oqaatigisinnaanagulu. Kisianni periarfissaqartunut ineqarnermut naalakkersuisup illunik maanna attartortunut aamma erseqqissaatigereerpaa, attartortumiit piginnittumut ikaarsaarnissamut periarfissaqartut, Kenneth T. Hansen, A/S INI-mi pisortaq nassuiaavoq.

A/S INI-p illunik attartortut 400-t qaffaanissanik nalunaarfigaat.

Nuunu Larsen oqarpoq, allatut ajornartumik inissiarsuarni inimik akilersinnaasaminnik ujarlertariaqalersinnaallutik.