Arlallit isornartorsiuipput: Naalakkersuisut Tunu soqutiginngilaat
Taassuma qatsulluinarpai Naalakkersuisut aggerfimminnit qilalugartassanik pisaseeqqittarnerat, tamannalu naammalersoq Nuko oqarpoq.
Emanuel Nuko tusagassiuutinut nalunaaruteqarluni allappoq, piniartut Tasiilami eqqaanilu qilalukkanik qernertanik pisasseqqinneqarnissaminnik qinnuteqartarsimagaluarlutik Naalakkersuisunit itigartitaajuaannartut.
Aggerfinni isumagigaa
Piniarnermulli naalakkersuisup aggerfini ingerlaannartumik pisassanik tunivaa,
Emanuel Nuko taama allappoq, tassani pineqarlutik Naalakkersuisut Upernaviup aqutsiveqarfianut qilalukkanik qernertanik 14-nik pisasseeqqinnerat, Jens Immanuelsenilu Upernavimminngaanersuunera pineqarluni.
- Kangianiittuusugut aamma uagut immikkut pisassinneqarusuppugut qilalugarpassuit isiginnaaginnartarpavut susinnaanatalu naammattunik pisassinneqartariaqarpugut, Emanuel Nuko taama allappoq.
Tasiilami Partii Naleqqap immikkoortortaqarfiani siulittaasoq, Aalisartut Piniartullu Kattuffiannit KNAPK-mit taperserneqarpoq, kattuffik isumaqarami Tasiilami eqqaanilu piniartut Naalakkersuisunit immikkoortinneqartut.
- Kangiani inoqatigut immikkoortikkunnaarlugit piaartumik inuussutissarsiortillugit neqissaqartittariaqalerpagut. Naalakkersuisut inuiaqatigut immikkoortikkunnaarlugit pisariaqartitsivissortut qilalukkat qernertanik piaartumik pisasseqqinneqartariaqarput, KNAPK-mi siulittaasup tullia Karl Tobiassen taama allappoq.