Arktisk Instituttip qaliarsuani nunatsinneersut assitoqqat nassaarineqartut
- Nassaakka tassaapput, poortugaaqqat 20-it kajortunik orsugasappasissunik poorneqarsimasut. Nassaat taakkua assinik negatiivinillu imaqarput, taamani qallunaat nunatsinnut ilisimasassarsiornerannit 1906-miit 1908-mut pisunut tunngasunik, taama aviisimut politikkinimut oqaluttuarpoq, Arktisk Instituttimi suleqataasoq Sörine Gejl.
Nassaarineqartuni negatiivini takuneqarsinnaapputtaaq, 1953-mi amerikamiut sermersuaq qulaallugu timmisartorneranniit assilisaat, allallu assitoqqat nunatsinninngaanneersut.
Nassaarineqartut ilagaattaaq taamani 1884-miit 1885-mut tunumi umiamik ilisimassarsiornermit assilisat, aamma assit aakajaarsuit kartonimut poorneqarsimasut. Assini taakkunani takuneqarsinnaapput kalaallit arnat atisaqaratik pinngortitami assilineqarsimasut. Assit amerlanerit atisaqanngitsuinnangajaapput. Assilisat toqqorneqarsimapput inuit kulturiannik inuusaasiannillu misissuinermut tunngasunik ilisimatusaatitut nalunaaqutsikkatut.
- Taamani issittumi ilisimasassarsiortartut kalaallit arnartaat atisaqartinnagit assilisarsimavaat, assillu inuit kulturiannik inuusaasiannillu misissuisimanermi ilisimatusaataaneersutut tunineqartarsimapput. Assit taakkua assut nunani killiunerusut pissusaannut assingunerupput, assilisittulli namminneerlutik tamanna isumassarsiarisimagunanngilluinnaraat, Sörine Gejl aviisip politikken nittartaanut oqarpoq.
Nassaat karserpassuarnut poorneqarsimasut oqaluttuarisaanermullu pingaarutilimmut tunngasut maannakkut nalunaarsorneqarlutik immikkoortiterneqaleruttorput. Artisk Institutti ukiut 50-it ingerlaneranni asserpassuarnik, atuakkanik allagaatinillu katersaateqarpoq, amerlanerillu internetti aqqutigalugu nittartakkakkut takuneqarsinnaapput, nassaarineqartullu taakku aamma kingusinnerusukkut nittartakkakkut takuneqarsinnaalissasut naatsorsuutigineqarpoq.
