Arktisk Institut Knud Rasmussenillu Illua suleqatigiinnissamik isumaqatigiissuteqartut
Isumaqatigiissut Arktisk Instituttip pisortaanit Bent Nielsenimit katersugaasivimmilu pisortamit Søren la Cour Jensenimit ippassaq atsioqatigiissutigineqarpoq.
-Sullissiviit assigiimmik suliaqarfiusut immikkoorlutik ingerlanneqannginnissaat imminnulli atorluarnissaat pingaaruteqarpoq, Bent Nielsen oqarpoq, ilaatigullu assersuutigaa Arktisk Instituttip Knud Rasmussenillu Illua internetimi akitsorterussinermi imminut unammeratarsinnaasut, tamanna sioqqullugu akitsorterissinissaq pillugu ataqatigiissaarisoqarsimanngippat.
Suleqatigiinnissamik isumaqatigiissummi ilaatigut allassimavoq Knud Rasmussenip Illua Arktisk Instituttilu saqqummersitsinerit, ilisimatuussutsikkut suliniutit nutaanillu pisaarnerit pillugit imminnut ilisimatitseqatigiittassasut, pigisaminnillu akeqanngitsumik akunnerminni atukkiussisassasut.
-Aaqqissuussaasumik isumaqatigiissuteqarnitsigut katersaatigisavut saqqumilaartinnerulernissaannut immitsinnut pisussaaffilerpugut, Knud Rasmussenip Illuani katersugaavimmi pisortaq Søren la Cour Jensen oqarpoq.
Suliffissuaqarnermut katersugaasivik Frederiksværkimiittoq, Knud Rasmussenillu Illuutaanik ingerlatsisuusoq, Issittumi ilisimasassarsiortorsuup aqqani Hundestedimi katersugaasivimmik nutaamik pilersitsiniarluni pilersaaruteqarpoq. Suliniullu taanna toqqammavigerpiarlugu sullissiviit taakku marluk aaqqissuussaasumik suleqatigiinnissartik kissaatigisimavaat, suleqatigiinnerammi qangaaniilli pitsaasumik ingerlareertoq, Bent Nielsen oqaatigaa.
Knud Rasmussenip Illuutaata Nunatta Katersugaasivia Nuummiittoq novembarip qaammataani assingusumik isumaqatigiissuteqarfigaa.
