Ark'alo A.: Anaananngujaartoqartuassaaq akisussaaffilli komuniniippoq
- Suli anaananngujaartoqartuassaaq, taakkualu ullumikkut pioreersumiit suli annertunerujussuarmik inunnik isumaginnittoqarfimmiit siunnersorlugillu isumagineqartariaqarput, Ark'alo Abelsen oqarpoq.
Ark'alo Abelsenip aamma Upernavimmiit juumuup radio aviisimi oqaaseqarnera tusaasimavaa, taannami oqarpoq avinngarusimasuni najugallit anaananngujaartartut ernereeraangata annerusumik ikiorsernagit angerlartiinnarneqartartut.
- Ajoraluartumik tamanna nalinginnaasuuvoq isumaqarpunga kommuneni ataasiakkaani tamatuma nukittorsarneqarnissaa suliniutigineqartariaqartoq, tassami kikkulluunniit anaananngujaartut immaqa angajoqqaavisalu siunnersorneqarnissaq pisariaqartippaat, Ark'alo Abelsen oqarpoq.
Peqqinnissamut Naalakkersuisoq aamma isumaqarpoq angajoqqaat inuusuttuaqqanik qitornallit, atoqatiginninnermut tunngasunik paqumisugatik qitornaminnut oqaloqatiginninnerusariaqartut.
- Paasititsiniaajuarneq aqqutissatuaavoq, uagut angajoqqaat pisussaaffeqarpugut, qitornavut inuusuttuaqqat atoqateqartalernerisa nalaanni paqumisugata kinguaassitit pillugit qitornatsinnik oqaloqateqartarsinnaassalluta, Ark'alo Abelsen oqarpoq. Erseqqissaavoq atuarfiit aamma taama atuartitsissuteqaraluartut naammassimanngimmatali ajornartorsiut taanna takkuttartoq.
