Arkalo Abelsenip Tasiilami aaqqiissutigineqarsinnaasut angerlaappai
Taakku taama Tasiilaliartariaqalernerannut patsisaavoq oqaatigineqarmat inuusuttorpassuit imminornissaminnik siorasaarisut arlaqarsimaqisut. Maannalu naalakkersuisup Tasiilamiit uternermini Tasiilamiit iliuusissatut kissaatigineqartut angerlaappai nalilersussallugillu.
Arkalo Abelsen ima aperaarput:
- Tassa taava imaappa imigassat kimittuut Tasiilami matuneqarataannaalersut?
- Uanga kommunalbestyrelsemi erseqqissumik oqaatigivara suulluunniit periarfissaasinnaasut mattutereerneqarnissaat kissaatiginagu, taamaattumik aamma taanna periarfissaasinnaasut ilagissavaat, Arkalo Abelsen oqarpoq.
Taanna erseqqissaavoq isumarluni imigassamik kimittuumik matusiinnarluni ajornartorsiutit aaqqinneqarsinnaanngitsut.
- Aaqqiiniutit assigiinngitsut ataqatigiissaarlugit aallartinniarsarissavagut, oqarpoq.
Arkalo Abelsen aperaarput imminornissamut siorasaarinermik ajornartorsiutaasut qanoq ilillugit aaqqeriarneqarsinnaanersut.
- Tasiilamiinnitsinni apeqqutaalluni kikkut oqaloqatiginerlugit assigiinngilaartorujussuarmik taassuma tungaa tusagaqarfigivarput. Socialforvaltningimi imminoriarsimanermut tunngatillugu ataaseq ilisimaneqarpoq, taavalu tusagassiutit aqqutigalugit allanik siorasaarisoqarsimanera ilisimavaat. Kisianni taamaakkaluartoq isumaqarpunga politiit, fritidsklubbi, socialforvaltningilu kusanarluinnartumik suleqatigiillutik aallartitsisimanerat nuannaarutigaara, oqarpoq nangipporlu:
- Inuusuttuaqqat ataatsimiigiaqquneqarsimapput taava tassani imminorusunneq imminortarnerlu eqqartorsimavaat, aammalu isumaqatigiissimapput tamanna misilittagaqarfigigamikku qaammammut ataasiarlutik taamatut naapittalerniarlutik, Arkalo Abelsen oqaluttuarpoq.
Taanna aperaarput naalakkersuisut tapiissuteqartussanngornersut.
- Kissaatigineqartut oqqutissavakka, ataatsimiititaliamilu nalilersorneqassapput naalakkersuisoqarfinni assigiinngitsuni suut periarfissaanersut, taava taakku naalakkersuisunut inassuteqareerpata uagut naalakkersuisuninngaanniit kommunalbestyrelsemut saaffiginneqqissuugut, taama oqarpoq maanna Islandimiittoq Ilaqutariinnermut Peqqissutsimullu naalakkersuisoq Arkalo Abelsen.
