Arkalo Abelsen Tasiilami oqaloqatiginnereerpoq
Maannalu uterluni Islandimut akimminnerani radio aviisimiit oqaloqatigaarput qanoq angusaqarsimanerannik paasiniaavigalutigu.
- Tasiilami Kommunalbestyrelse oqaloqatigaara qanorlu iliorluta ikiuussinnaanitsinnik tusarniaavigaakka. Taakku kissaatigisaat maanna nassarlugit uterpunga kissaatigineqartullu ataatsimiititaliamut suligasuartumut suliakkiissutigissavakka, Arkalo Abelsen oqarpoq.
Arkalo Abelsen aperaarput Tasiilami politiit ittuanniit kissaatigineqartutuut imigassaq kimittooq matuneqassanersoq.
- Imigassap matunerinnaatigut ajornartorsiutit aaqqissinnaasorinngilakka kisiannili tamanna periarfissaasinnaasunut ilaavoq, Arkalo Abelsen oqarpoq.
Imminut toqunnissamik siorasaarinerit arlaqarnerujussuisa qanoq ilillugit aaqqivigineqarnissaannut atatillugu Arkalo Abelsen erseqqissaavoq nassuiaassutigineqartut assigiinngitsut nammineq tusarini, ilaatigut nassuiaatigineqarsimammat inunnit isumaginnittoqarfimmiit taamatut siorasaarisimaneq ilisimaneqartoq ataasiinnaasoq tusagassiutitigullu tusagaq aamma ataasiinnaalluni.
