ArK'alo Abelsen: Takutitsilluartariaqarpugut

Silap pissusaata allanngoriartornera tusarsaajuarpoq. Allanngornerullu sunniutaasa ajornartorsiutaanerannut kalaallit sunniuteqaqataassappata, Kalaallit Nunaanni innuttaasut namminneq aamma takutitsilluartariaqartut Avatangiisinut Naalakkersuisoq ArK'alo Abelsen oqarpoq.

Biilit pingaartumik ukiuunerani uninngatillugit motooriisa ingerlatiinnartarnerat nalinginnaavallaartup saniatigut meeqqat ilaqutariinni inersimasunit maligassiorluarneqarnerusariaqartut, ArK’alo Abelsen oqarpoq:

- Isumaqarpunga angajoqqaat, inersimasut, annertoorujussuarmik pisussaaffeqartugut meeqqagut, meerartagut, maligassiussallugit, naalakkersuisoq amma isumaqarpoq eqqaanerujussuaq aamma meeqqerivinni atuarfinnilu tapertaasumik maannangaaq sammineqartariaqalersoq.

Mamakujuttut, chipsit sodavandit cigarettit, allarpassuillu puukui ulluinnarni illoqarfiup aqqusernini, ineqarfinni sumilu tamaani, aamma inuilaarsuarmi siumorneqarsinnaajuartarput.

ArKalo Abelsen aperaarput nammineq avatangiisit mingutsinnginnissaanut atatillugu suliniaqataanersoq. Oqarpoq, biilimi motooria ingerlaartinnagu unitsittarlugu allaallu maangaannaq allat eqqartagaannik katersisarluni.

- Isumaqarpunga uagut ilaqutariinnguit meeqqagulli mikisuararsuusut ileqqorisimagipput sumiluunniit angalaarangatta asimiissimagutta imaluunniit pisuttuarsimagutta, tassa utertarpugut eqqagassanik katersisimalluta, nassuiaavoq.

- Angalaarsimagutta poorsuaq eqqagassanik imalik nassarlugu eqqaavimmut igittarparput imaluunniit pisuttuareerluta angerlarutta kaasarfigut puukorpassuarnik imaqartut imaartarpagut.

Nalinginnaavallaaqaaq - inersimasut meeqqallu suulluunniit imaarunikkit sumulluunniit igiinnassavaat, ArK'alo Abelsen oqarpoq.