Arkalo Abelsen partii Atassummiit anivoq

Arkalo Abelsenip Atassummit tunuarnini ilaatigut tunngavilersorpaa, qanittukkut naalakkersuisutut uppisitaanermini partiip Atassutip tamanna peqataaffigisimammagu, taamatullu aamma tallimanngormat Kultureqarnermut Ilinniartitaanermut, Ilisimatusarnermut Ilageeqarnermullu naalakkersuisumut Tommy Marømut naalakkersuisutut akisussaaffii pillugit inatsisartut tatiginninnginnermik taasisitsisoqarnerani Atassutip piumasaqaatit imminut atorneqartut assinginik piumasaqarfigisimanngimmagu.

-Siullermik parteerisamma naalakkersuisutut akisussaassuseqarneq pillugu aalajangiussinera ataqqivara, naalakkersuisutut tunuartariaqarninnik kinguneqaraluartoq. Kisiannili Atassummit Tommy Marø uattulli akisussaaffimminik malitassaminik unioqqutitsisutut nalilerneqaraluartoq taanna piumasaqarfigineqanngilaq. Taamaammat isumaqarpunga uanga pineqarnera inuttarsiuinerusoq, taamaalillungalu aalajangerpunga partiimi Atassummit ilaasortaanera ingerlateqqissinnaanagu, Ark’alo Abelsen Radiaoviisimut oqarpoq.

Arkalo Abelsenip sapaatip akunnera kingulleq naalakkersuisutut tunuarnissani toqqarpaa, malugigamiuk inatsisartut imminut tatiginninnginnermik taasisitsinissami nammineq Parteerisani Atassut tapersuisoq. Tallimanngormat naalakkersuisoq Tommy Marø Atassutip iluaqusiineratigut annaqqarpoq, naak ingerlatsinermi kukkunersiuisut paasissutisseereersut ilumut Marø Inatsisartut aningaasaqarnermut ataatsimiititalianut pingaaruteqartunik isertuussisimasoq.

Ark’alo Abelsen partiimi Atassummi ataqqinaammik ilaasortaagaluarpoq, inatsisartunili ilaasortaanani avataaniit “aaneqarluni” naalakkersuisunngortinneqaraluarpoq qanittukkut tunuarnissani tikillugu.

Arkalo Abelsen sooq Siumumut nuunneersut aperineqarami oqarpoq, Siumut partii taannaasoq naalakkersuisuunerma nalaani tapersersuinerpaasoq.