Arkalo Abelsen avoqqaarineqarpoq
Arkalo Abelsenip ilaquttanut inissiisarnermi malittarisassat tunngavilersuutigalugit allanngortitserusunnginnera, peqatigiiffiup siulittaasuanit, Ellen Sofie Chemnitzimit avoqqaarineqarpoq, tunngavilersuutigineqartut inatsisitigut qulakkeerneqarsinnaammata.
Angajoqqaarsianngortartut 25-nik ukioqalereersimasarnissaat suli kaammattuutigerusupparput, Ellen Sofie Chemnitz oqarpoq. Sapaatip akunnerani kingullermi naalakkersuisoq oqaloqatigerusullugu allagaqarfigigaluarparput akissuteqanngilarli, angajoqqaarsiat qanoq imminnut piumaffigisariaqartarnerat oqaluttuarerusukkaluarlutigu. Meeqqanut inuusuttunullu angajoqqaarsiaaneq sunik imaqarnersoq, meeqqanillu sumiginnakkanik paarsaqalernerup qanoq piumaffiginartigisarnera politikerinut oqalugiaatigerusukkaluaratsigu. Angajoqqaarsiaanerup ulluinnarni qanoq isumaqarnera eqqartorusukkaluarparput, imaalitsiaannarlunimi qatanngutip meeraa imaluunniit ernutaq meerarsiatut akisussaaffigilerlugu tiguneqarsinnaanngilaq.
Nuummi angajoqqaarsiat peqatigiiffianni siulittaasoq, Ellen Sofie Chemnitz, oqarportaaq minnerpaamik angajoqqaarsianngorniartut oqaloqatigineqaqqaartariaqaraluartut angajoqqaarsianngorusunnerannut pissutaasut paasiniarlugit taassumalu saniatigut nakorsamiit akuersissummik allagaqaat piumasaqaatigineqartariaqaraluartoq.
Ullumikkut angajoqqaarsianngorniat tuberkolosernersut paasiniarlugit aaversittarput tarrarsortillutillu, kommunemit oqaloqatigineqartarput angerlarsimaffiannullu pulaartoqartarluni. Meerarsiavittaalernermi periutsit angajoqqaarsianngorniartunut atuutsinneqalernissaat peqatigiiffimmit piumasarineqaraluarpoq.
