Arkalo Abelsen allanngortitsinianngimmat tupaallaatigaat

Angajoqqaarsiat Nuummi peqatigiiffiata tupaallaatigaa angajoqqaarsianik akuersissutiginnittarnermi inatsisit Naalakkersuisunut ilaasortap Arkalo Abelsenip, allanngortinnianngimmagit. Naalakkersuisut angajoqqaarsianik akuersissutiginnittarnermi malittarisassanik allannguinissamut pilersaaruteqanngillat. Tamanna erserpoq Atassutip naalakkersuisunut apeqquteqaateqarnerani.
januaarip 21-at 2008 07:39

Angajoqqaarsiassatut akuerisat ukiuisa minnerpaaffeqartinneqarnerat naalakkersuisunit aamma allanngortinniarneqanngilaq.

Qatanngutigiinni arlaliusuni qatanngutaasoq 20-nik ukioqarsimappat taanna periarfissinneqassaaq qatanngutimi ukiukinnerusut akisussaaffigilernissaannut, angajoqqaajusut toqusimappata, Peqqissutsimut naalakkersuisoq Arkalo Abelsen, Atassutip apeqquteqaateqarneranut akissuteqarnermini allappoq.

-Taama inissiisarneq “ilaqutariinni inissiinermik” ulluinnarni taaneqartarpoq, taamalu inissiinissap inatsisini atortinneqarsinnaanera nangaassutigineqarsinnaavoq.

Suli kaammattuutigerusupparput angajoqqaarsianngortussat minnerpaamik 25-nik ukioqalereersimanissaat, Ellen Sofie Chemnitz, angajoqqaarsiat Nuummi peqatigiiffianni siulittaasoq, oqarpoq.