Arina Arctica amutittussanngorpoq
Umiarsuup sarpimmi eqqaatigut immattalersimanera pissutigalugu, Arina Arctica Royal Arctic Line-p angalajunnaartikkallarpaa.
decembarip 08-at 2010 08:50
Kalaallit Nunaata Kitaani ukiuunera tamakkerlugu assartueqqittartutut Arina Arcticap atorneqarnissaa pilersaarutaagaluarpoq. Angalanissamut pilersaarut taanna Irena Arcticamit utaqqiisaagallartumik ingerlanneqalissaaq. Atlantikukkut assartuinermi Irena Arcticap tulliani pilersaarutaasoq angalanissaa aallarnerfigalugu umiarsuarmik attartukkamik taarserneqassaaq.
Arina Arctica Royal Arctic Line-p umiarsuaataasa containerersuutit pisoqaanersaraat - 1984-imi sanaajulluni - ilimagineqarporlu 2012-imi 2013-imiluunniit atorunnaassasoq, taavalu umiarsuarmik nutaamik Mary Arcticatut ilusilimmik taarserneqarluni. Umiarsuaatileqatigiiffimmit taama ilisimatitsipput.