Arfivimmik pisassinneqarnertik nuannaarutigeqaat

Qanga piniartarnerit naapertorlugit arfivimmik Kangiqsujuarmiut piniarniarput, atortulli nutaat aamma atorneqassallutik.

Piniartut isumannaatsumik piniarsinnaanissaat siunertaavoq, arfivillu pissusissamisoortumik toqunneqarnissaa anguniarneqarluni.

Arfiviit nungukkiartulersimanissaat aarleqqutigineqarsimagaluarpoq, Canadamili oqartussat ilimagaat arfiviit Issittup imartaani nassaassaasut 14.000-it missaanniissasut.

Nunavimmi naggueqatigiit kattuffiat Makivik Corporation arfivimmik pisaqartoqarnissaanik akuersisuuvoq:

- Canadap aalisarnermut piniarnermullu aqutsisoqarfia suleqatigalugu Makivik Corporation arfivimmik pisassiivoq, qangarsuanngorporlu arfivimmik pisaqartoqarmalli, Makiviup præsidentia Piita Aatami oqarpoq, nangipporlu:

- Piniartut 40-t missaat angallateeqqat 14-it atorlugit piniassapput, taakkunanngalu tallimat aallaasersortunik piniartoqassallutik. Umiarsuaq Canadap piniarnermut aqutsisoqarfianeersoq piniarnermik alaatsinaassaaq, biologillu umiarsuarmut aamma ilaatinneqassallutik. Taakku ilisimasassarsiutigalugu ilaassapput, Piita Aatami oqarpoq.

Arfivinniarneq ippassaq aallartinneqarpoq, piniartullu piniarnissaminnut aggustip 15-iata tungaanut periarfissinneqarput.