Arfivik pillugu filmiliaq tv-kkut isiginnaarneqarsinnaassaaq
Arfivik uumasuuvoq eqqumiitsoq. Filmiliortartoq Adam Schmedes aviisimut ullormut saqqummersartumut Politikenimut taama oqarpoq.
Arfivik pillugu filmiliami persuarsiuutigineqaqisumi taanna ilitsersuisuuvoq. Filmi "Ishavets kæmpe", Issittup imartaata uumasorujussuanik nutserneqarsinnaasoq taassuma suliarisimavaa, Danmarkillu Radioani DR1-imi unnugu nalunaaqutaq arfineq-pingasunut isiginnaarneqarsinnaajumaarluni.
Filmi "Ishavets kæmpe" pinngortitaq pillugu Danmarkimit filmiliat maannamut annersaattut Adam Schmedesip taavaa, filmiliarlu 10 millionit koruunini akeqarsimalluni.
Arfivik 220-nik ukioqalersinnaasoq Schmedesip alutorsaatigeqigaa Politiken.dk-p allaaseraa:
- Nunarsuarmiut ukiuni kingullerni 200-ni oqaluttuarisaanerannut peqataasimavoq, Adam Schmedes oqarpoq, arfivillu ataaseq Frankrigimi 1700-kkut naalerneranni mumisitsisoqarneraniit maannamut uumanera malinnaavigineqarluni.
Assit pikkunartut siornatigullu takutinneqarsimanngitsut "Ishavets kæmpe"-mi takutinneqarumaartut Schmedesip neriorsuutigaa, pinngortitarlu pillugu soorlu tuluit tv-qarfissuanni BBC-mi sulianut assingusumik filmiliortoqarsimannginnerarlugu. BBC-p filmilioriaasianut naleqqiullugu allarluinnarmik suleriaaseqartoqarsimasoq Politikenip oqaatigaa.
Alutornartumik pikkunartumillu oqaluttualiorniarluni filmi piviusunngortinneqarsimasoq Adam Schmedesip, 67-inik ukiullip, oqaatigaa.