Arfivik Ilulissani pisarisinnaagaluarlugu tammaavaat

Ilulissani piniarnermut nakkutilliisoq, Ole Jeremiassen, sapaatip akunnerata naanera tamaat arfivimmik ujaasigaluarpoq, iluatsinngitsumik. Arfivik taanna allunaasarpassuarnut

nerngussimasoq.

Ole Jeremiassen ima oqaluttuarpoq:

- Nammineq angalallunga VHF-ikkut attavigineqarpunga arfivik naammattorneqarsimasoq. Ilassarsioriarlunga alakkarterpara, piniartumit John Jensenimit najorneqartoq. Takuara arfivik allunaasarpassuarnut qilersuussimasoq.

Piniarnermut Pisortaqarfik Nuummiittoq attavigaara, akuerineqarpungalu arfivik pisarisinnaagipput. Taarsilermalli aqaguani arfininngornikkut ullaakkut aatsaat alakkarteqqissinnaavarput, angallatillu toqutsisussat marluk peqatigalugit ullaaralaaq aallarpugut. Arfivimmik takuffitsinnut pigatta avannaq-kippasimmik anorlilersimavoq, sikullu puttaarsuit taaaniilersimapput, taamaalillutalu uumasoq taanna naammattuunngitsoorparput. Ullut unnuallu marluk ujaasigaluarpugut, arfivippassuillu allat takuneqarput, kisianni taannarpiaq naammattoorneqarani, Ole Jeremiassen oqaluttuarpoq.

Arfivik ikinik ulikkaarsimavoq, allunaasarpassuarnullu silittorsuarnut qilersuussimalluni, ilimanarporlugooq allunaasat taakku saattuarniutinut amuartaataasut. Arfivik oqimaarsarpasissimavoq, allatut aqqarneq ajorsimavoq, soorlu tunummut nusutsittutut, tassa napparluni, aqqartarluni. Ikeqangaatsiarsimavoq, sarpimmik tunuatigut ikerujussuaqarluni, qaavalu tamarmi kigarnersuarnik ulikkaarluni, nalunanngitsuminngooq allunaasat kigaruffigisimasaannik.