Arfiviit marluk pisaraat

Nutartigaq nal. 16.12

Ilulissani angallatip Katriinap napparutaani arfiviup taleruarujussua nivingavoq. Arfiviit marluk Imerissup kitaatungaani tallimanngormat pisarineqarput.

Otto Mathiessen Ilulissaneersoq pisaqaqataasoq oqarpoq tasamani kitiminni tamakkorpassuaqartoq.

- Arfiviit marluk tallimaalluta agguarpavut, pisaqaqataasullu illoqarfinnut allanut ingerlapput, Otto Mathiessen oqarpoq.

Angallatit arfinillit, Ilulissanit sisamat, Aasiannit ataaseq Kangaatsiamiillu ataaseq piniaqataapput.

Arfiviit pisarineqartut arnaviaapput, aappaa 15,6 meteriusoq aappaa 14,3 meteriuvoq. Arfiviit angingaammata ullut marluk pilanneqarput.

- Arfivik uanga mamarnerutippara, Otto Mathiessen oqarpoq, orsualu orsorsunninnerunngitsoq unnerlugu.

Aalisarnermut Piniarnermullu Naalakkersuisoqarfimmi AC-fuldmægtigiusoq Nette Levermann, piniarnermik nakkutilliisoq peqatigalugulu arfivinniarnissamut piareersaaqataapput.

- Piniaqataasussat ulloq sisamanngorneq tamaat sungiusarfigaat, arfiviummi sukkut qamutilikkaanni sukkasuumik toqunneqarnissaa paasisimasaqarfigissallugu pinaartuuvoq, oqarpoq.

Arfivik 1938-mili eqqissisimatitaalluinnarpoq, Kalaallit Nunaannilu siorna pisarineqaqqissinnaalerluni. Arfiviit ukioq manna pisarineqarsinnaasut pingasuupput, sinneruttorlu maanna tassa ataasiinnanngorpoq.