Arfiviit Kitaanut "fiisteriartuusiinnartarput"
Arfiviugaanni arnaviaallunilu taava Nunatta kitaa neriniarfigissallugu pilerinarneruvoq.
Arfiviit Nunatta imartaaniittartut 80 procentii arnaviaasut inersimasut piaqqioriaannaasullu ilisimatusarnermi paasineqarsimavoq.
- Arfiviit arnavissat tamaaniittartut illaaqalereersimanngikkaagamik angutivissanik ujarlerlutik tamaaniittarput, Pinngortitaleriffimmi seniorforskeri, Mads Peter Heide-Jørgensen oqaluttuarpoq nangillunilu:
- Arfiviit arnavissat Hudsonip kangerliumarngani, tassa Canadap imartaani, piaqqisarput. Nunattali kitaata imartaa neriniarfigisarpaat puallarserlutik, tassami tamaani tappiorannartunik nerisassaqarluaramik, ingammik Qeqertarsuup eqqaani, Mads Peter Heide-Jørgensen oqarpoq.
Arfiviit angutivissat tamaaniittartut ikittuaraapput, taamaattumillu arnavissat neriniarneranni ulapittorujussuusarlutik.
- Arnavissat illaaqalereersimasut eqqarsaatigissanngikkaanni, allat angutivissanut nuliunialersarput. Tamatumalu kingorna Hudsonip Kangerliumarnganut piaqqisariartortarput, arfiviit mikisut "uiallu" tamaasa peqatigalugit. Katersuukkaangamik arnavissat angutivissallu amerlaqatigiittartut, paasisat kingulliit tamanna paasinarsisippaat, Mads Peter Heide-Jørgensen oqarpoq.
Nunatta kitaani paasiniaanerni Qeqertarsuup eqqaamiui piniartut ikiortigineqarluartarput, tassami taakku katersugaat misissuinerni atorneqartaramik. Misissuinerit ingerlanneqarput ukioq 2000 aallarnerfigalugu siorna 2010 tikillugu.