Arfiviit asiutinneqartarnerat siunissami pinaveersaartinneqassaaq
- Angallatit qassit sorliit, piniartut qassit, sumi pilanneqassava, kalinnerani suut pissutsit eqqaamaneqassappat, tulaanneqarnerani amuneqarnerani, pilanneqarneranilu suut atortut, kalikkaanni piffissaq qanoq sivisutigisoq ingerlassava, tamakku tamaasa eqqarsaatigalugit pilersaarusiortoqassaaq, pisortaqarfimmi pisortaq Amalie Jessen nassuiaavoq.
Arfivik 1938-mi piniaqqusaajunnaavippoq aatsaallu Kalaallit Nunaat 2007-imi ukiumut arfivinnik marlunnik IWC-miit pisassinneqarpoq 2008-miit atuutilersussamik.
Piniarnerli aatsaat 2009-mi aallartsinneqarpoq, biologit siunnersuuteqarnerat Ilisimatuussutsikkut Ataatsimiititaliami, kingornagullu IWC-p ataatsimiititaliarsuaani junimi 2008-mi ataatsimeersuarnerani uppernarsaqqinneqaqqaartussaammat.
Katillugit arfiviit arfinillit ukiut marluk kingulliit ingerlaneranni pisarineqarput.
- 1938-mili eqissisimatitaalermat soorunami piniartortatta taannarpiaq qanoq piniassanerlugu ilisimasaqarfiginngilaat, taamaattumik aallaqqaataaniit ilinniagassaasoq oqarsinnaavugut, Amalie Jessen oqarpoq.
Arfiviit piniarneqarnerat Nunani allanit isiginiarneqartorujussuuvoq.
- Arfivik iluaqutissaavoq avammullu niuerutigeqqusaanani. Aamma arfivik toqukkasuarneqarsimanersoq qanorlu atorluarneqarsimatiginersoq
pinngitsoornata arfanniarnermut ataatsimiititaliarsuarmut nalunaarutigisussaavarput, taamaattumik nunanut allanut attuumassuteqarnera pingaaruteqarpoq, Amalie Jessen naggasiivoq.
