Arfiviit ajornartorsiortitsisut

Arfiviit 50-it missaannik amerlassuseqartut Canadap kujasinnerusortaani Fundy-p Kangerliumarnganiittut suli kujammut ingerlaalersimanngillat. Tamanna peqqussuarniartunut, sapaatip-akunnerata tulliani aallartittussanut akornutaaleratarsinnaavoq.

Oktobarip qiteqqunnerani arferit amerlanersaat pisarnertik malillugu kujammut ingerlaalerput. Kisianni arferit ilaat suli kujammut aallanngillat aalisartullu sapaatip-akunnerata tulliani peqqussuarnut pullasertussaagaluarput.

- Arferit amerlassusaat aamma peqqussuarniarnerup aallartinnissaa ernumanartoqartipparput, tassami arferit pullatit allunaasartaannut nermussaasinnaammata, Jerry Conway aalisarnermut ministeeriaqarfimmeersoq Canadian Press-imut oqarpoq.

Taanna isumaqarpoq arferit nerisassaqangaaramik suli kujammut ingerlaalersimanngitsut.

Arferit sumiinnerisa nakkutigineqarnissaat periarfissaavoq taamalu aalisartut arferit tikittanngisaannut pullasersinnaassallutik.

Taamaattorli Klaus Sonnenberg oqarpoq aalisartut ingasaallugu qisuariartut. Taassuma Fundy-p Kangerliumarnga 1978-imiilli timmisartumik qulaattarsimavaa.

- Oqaatigisinnaavara taama pisoqarnera nutaarsiassaanngimmat. Ukiup taamaalinerani Fundy-p kangerliumarngani arfiviit uninngaartarnerat nalinginnaalluinnarpoq.