Arfiviit 30 procentii asiupput
Arferit neqaa mattallu nerineqarsinnaasut katillugit 2-3 tonsiussasut missiliuussisoqarpoq, tassami arferit pilapallannissaat iluatsissimanngimmat. Taakkua 30 procentinut naapertuupput. Kisitsisit 2009-mi arfiviit pisarineqartut iluaqutigineqarsimanerannut sanilliullugit naatsorsorneqarput.
Demokraatineersup Niels Thomsenip arfannermi kukkussuteqartoqarsimaneranik tusatsiakkani arferit pisarineqarneranni qanoq atsigisoq iluaqutigineqarsimanersoq pillugu Naalakkersuisut akissuteqarnissaat piumasaraa. Tassalu akissut taannaavoq piniarnermut naalakkersuisup Ane Hansenip maanna nassiussaa.
Naalakkersuisut paasissutissiinerat naapertorlugu arferit Qeqertarsuup tunuani unnoreersoq pisarineqarput unnuarlu tamaat kalinneqarlutik, aatsaallu ullaakkut pilannerat aallartinneqarluni. Naak ulluni marlunni arferit pinasuartumik pilanneqaraluartut tassa neqit ilarujussui pullannilereersimapput.
Naalakkersuisup Ane Hansenip Demokraatineersumut Niels Thomsenimut akissummini arfernik pisaqarfiit pilattarfinnut akuerisaasunut naleqqiullugit sukaterneqarnissaannut periarfissat neriorsuutigai.
- Tamanut tunngatillugu erseqqissassavara uumasut pisat ilaannaasa iluaqutigineqartarnerat Naalakkersuisut sukkulluunniit akuersaarsinnaanngimmassuk, taama allappoq.
Taassuma aamma erseqqissarpaa, ukiup naajartulernerani arferit pingasuugaangata pingajuat tamakkerluni iluaqutigineqartartoq.
Arfivik 1938-mi eqqissisimatitaalerpoq, 2007-imili arferujussuarnik taakkuninnga piniarneq siullermeerluni inerteqqutaajunnaarpoq. Katillugit arfiviit arfinillit pisarineqarput.
