Arfininngorpamiit kapisilinniartoqalissaaq

Nammineq atorfissaqartitanik aalisarneq tassaavoq, nammineq atugassanik aalisarnermut, kiisalu inuussutissarsiutigalugu aalisartunut, kalaalimineerniarfinni najukkanilu suliffeqarfinni, soorlu napparsimmavinni, akunnittarfinni, sutorniartarfinni, atuarfeqarfinni allanilu tunisassanik kapisilinniarsinnaaneq. Taamali tunisaqarniaraanni akuersissummik kommunerisamut qinnuteqarnissaq piumasaqaataavoq.

Kapisilinniarnissaq arfininngorpat aallartissaaq. KNAPK isumasioqatigereerlugu kapisilinniarnissap aggustip ulluisa aallaqqaataanni aallartinnissaa aalajangiunneqarpoq, oktobarillu ulluisa 31-anni unitsinneqassalluni.

Piffissaliunneqartut avataatigut kapisilinniarneq inerteqqutaavoq, unioqqutitsinerillu pisanik arsaarinnissummik kinguneqarsinnaapput.

Kapisilinnik aalisakkerivinnut tunisisinnaaneq, aamma kapisilinnik avammut nioqquteqarnissaq inerteqqutaavoq. Atlantikup Avannaani kapisilinnik pissamaatinik nungusaataanngitsumik iluaquteqarnissaq taama aalajangernermut pissutaavoq, Atlantikup Avannaani Kapisillit piujuaannartinneqarnissaannut suleqatigiiffiup, NASCO-p, Kalaallit Nunaata Kitaani kapisilinniarnerup killilersornissaanik isumaqatiginninniarnerni angusanut naapertuulluni.

Pisat tunisallu tamaasa KANUAANA-mut nalunaarutigineqassapput. Kapisilinnillu nalunaaqqutsikkanik pisaqaraanni, nalunaaqquttat Pinngortitaleriffimmut nassiunnissaat ajunnginnerpaavoq. Taamaalioraannimi Atlantikup Avannaani Kapisillit piujuaannartinneqarnissaannut suleqatigiiffiup, NASCO-p, ukiumoortumik makitsinerani peqataasoqarsinnaavoq, akissarsiassarlu anneq 1500 dollariuvoq.