Arfininngorneq immiorfiit ulluat
Pulaartunit immiorfimmi immiap naqqanniik qanoq suliarineqartarnera takuneqarsinnaassaaq. Immiorfiit ulluat "Bryggeriernes dag" Danmarkimi Bryggeriforeningimit aaqqiissussaavoq. Bryggeriforening Tuborgimit, Carlsbergimit immiorfeeqqanillu allanit ilaasortaaffigineqartoq, Godthåb Bryhusip Kalaallit Nunaannit kisiartaalluni ilaasortaaffigaa.
-Bryggeriforegningimi ukioq ataasip missaa ilaasortaareerluta siullermeerluta immiorfiit ulluanni peqataasussanngorpugut. Neriutigaaralu Nuummi innuttaasut takornarissallu taamatut aaqqissuussinitsinni soqutiginnillutik takusaalluarumaartut. Taamaalillutimmi neriniartarfimmi immialiortarnerput qanoq ingerlariaaseqartoq takusinnaammassuk, Jørgen Pedersen Godthåb Bryghusimi piginnittoq taama oqaluttuarpoq.
Immiaaqqanit naammassereersuninngaanniit immiap qanoq suliarineqarnera nammineq takussallugu pissanganartuuvoq ilisimasanillu nutaanik tunisisinnaalluni.
- Immiorfimmi brygmesteri tyskiusoq immiorfimmi takornariartitsissaaq. Siusinnerusut immiorfimmut suliffeqarfinnut takusaarusuttunut ilisarititsisareersimavugut. Taamaliornitsinnilu inuit qulit aqqanneq marlullu missaani immiorfimmi inissaqartittarlugit. Taamaattumik arfininngorpat takusaarusuttut amerlassappata utaqqilaarsinnaanissaq naatsorsuutigineqarsinnaavoq. Takusaanermilu immialiatsinnik misiliisinnaanissamut periarfissaqassaaq, Jørgen Pedersen siunissami taama ulloqartisisarnissap ingerlannaarnissaanik neriuuteqartoq taama naggasiivoq.
