Erik Jensen: Arfineq-marlunnik mittarfiliortoqassaaq
Illoqarfiit arfineq marluk tassalu, Qeqertarsuaq, Qasiannguit, Kangaatsiaq, Narsaq, Nanortalik, Tasiilaq Ittoqqortoormiillu mittarfiliorfigineqassapput.
Naak Inatsisartut 2015-imi ukiakkut ataatsimiinnerminni nutaanik arfineq-marlunnik mittarfiliortoqarnissaa aalajangereeraluaraat aningaasalernissaa suli inissinneqanngilaq.
AAMMA ATUARUK Silaannakkut angallanneq tamarmiusoq Naalakkersuisut ineriartortinniarpaat
2019-imut aningaasanut inatsimmiissagunartut
Nunalli immikkoortuini mittarfiliornissat qanoq aningaasalerneqarnissaat eqqartorneqartillugit attaveqaqatigiinnermut naalakkersuisup 2019-imut aningaasanut inatsisissaq innersuussutigaa.
- 2019-imi sanaartorneq aatsaat aallartissinnaavoq, piffissami tassani partiit tamarmik aamma tapersiinissaat neriuutigissavarput. Tamanna Inatsisartut aalajangigaat akuerineqarnikuuvoq, tamannalu toraarlugu Naalakkersuisuni sulivugut, Erik Jensen oqarpoq.
Erik Jensen naapertorlugu nunap immikkoortuini mittarfiliornissanut pilersaarut suli aallartivinngimmat taakku qanoq akeqarnissaata naatsorsuutiginerat Naalakkersuisut maannakkuugallaq oqaatigisinnaanngilaat.
Taamaammat attaveqaqatigiinnermut naalakkersuisup mittarfinnut arfineq-marlunnut pilersaarut 2019-imut aningaasanut inatsimmit aningaasalerneqassanersoq ukiunulluunniit arlalinnut agguarneqassanersoq aamma akisinnaanngilaa.
- Tamanna pillugu maannakkut oqaaseqarsinnaanngilanga. Oqaatigeriikkattut aallartisarnissaannut suli suliassaqaqaaq, taamaammat qanoq aningaasalerneqassanersoq oqaatigisinnaanngilara, attaveqaqatigiinnermut naalakkersuisoq, Erik Jensen oqarpoq.
