Arferup neqaanik sushiliat sassaalliutigisinnaassanngilai

Norgimi neriniartarfiit imminnut ataqatigiissut tusaamaneqartut Alex Sushi-mik taaguutillit Københavnimi immikkoortortaminnik maajimi ammaappata, neriniartarfiit tusaamasaassutiginerpaasaat, arfermit nerisassiaq - hval sashimi - nerineqarsinnaasunut ilaanavianngilaq.

- Qallunaat assorsuaq arfermik sassaallerfigerusukkaluaratsigik, kisianni paasivarput tamanna inatsisinik unioqqutitsinerussasoq, piginneqataasoq pisortaasorlu Wolfgang Schlereth oqarpoq.

Norgimi arfernik sassaallernissaq ajornartorsiutitaqanngimmat, tamaani arfernit nerisassiat piumaneqaqisut sassaalliutigisarpavut, tassaasut hval sashimi - tassa arferup neqaa ooqanngitsoq amitsukujuunngorlugu aggugaq - aamma arferup neqaa sushinik qaqorteqqasuligaq.

Danmarkimi inatsisinut tunngasut paasineqarmata, Alex Sushimik piginnittut arferup neqaanik tuniniaasinnaanertik taamaatiinnarpaat.

- Arferup neqaanik Danmarkimut eqqussinissaq tuniniaanissarlu 1996-imili inerteqqutaalersimasut paasitinneqarpugut. Aamma naak arferup neqaa Savalimmiuni, Islandimi, Kalaallit Nunaanni aamma Norgimi nerineqartaraluartoq, Wolfgang Schlereth aviisimut Politikenimut oqarpoq.

Sushinik nerisassaarniarfik Københavnimi maajimi ammarneqassaaq, naak arferup neqaanik pisiassaqassanngikkaluartoq.