Avatangiisit

Arferpassuit toqungasut Chilep sineriaani nassaarineqartut

Arferit 340-t missaanniittut Chilep sineriaani Pantagoniami qeqertami avinngarusimasumi toqungallutik tippussaasimasut nassaarineqarsimapput. Arfernik toqungasunik taama amerlatigisunik sumiiffimmi ataatsimi aatsaat siumuisoqarpoq.
Tikaagulliusaarnaq tikaagulliusaat anginerit pingajoraat, 12-16 meterinik takitigilersinnaalluni tonsinillu 20-30-nik oqimaassuseqalersinnaalluni. Assi © : Toxic Web/Flickr Creative Commons
Allattoq Ritzau
decembarip 02-at 2015 06:57
Nutserisoq Simon Uldum -

- Takusaq amiilaarnaqaaq. Aatsaat taama takusaqarpunga, arfernik nassaartut ilaat, imaani uumassusilinnik ilisimatooq Vreni Hausserman taama oqarpoq.

Arferit toqungasut ajoqusersimanerannik takusassaqanngilaq, virusimilli imaluunniit immap naasuinik toqunartunissimasunik toqquteqarsimanissaat ilimagineqarpoq.

Arferit Chilep illoqarfiisa pingaarnersaata Santiagop kujataani kilometerinik 2000-inik ungasissusilimmiipput ilisimatuullu kisitsiartortinneqarsimapput.

- Arferit toqungasut ilaallu saaniinnanngorsimasut ikinnerpaamik 337-t nassaarineqarput, Haussermann oqarpoq.

- Sumiiffiilli arlallit suli tikinngilagut, taamaammat arfernik toqungasunik allanik nassaassaqarnissaa ilimanarsinnaavoq.

Tikaagulliusaarnaq tikaagulliusaat anginerit pingajoraat, 12-16 meterinik takitigilersinnaalluni tonsinillu 20-30-nik oqimaassuseqarsinnaalluni.

Arfernik toqungasunik nassaartoqarnera Naalagaaffiit Peqatigiit silap pissusia pillugu Parisimi ataatsimeersuartitsinerat COP21 nalerorlugu avammut saqqummiunneqarpoq.

Imaani uumassusilinnik ilisimatuut oqaatigaat imavissuit kissatsikkiartornerat arfernut aarlerinartuusoq arferit nerisartagaat tamanna pissutigalugu ikiliartormata ukiullu qanoq ilinerani aalajangersimasumik ingerlaartarnerannik allanngortitsimmat.

/ritzau/

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq