Arfernik kisitsineq annerpaaq naammassineqaqqammerpoq

Arfernik kisitsineq oqaluttuarisaanermi annertunerpaaq naammassivoq. Atlantikup Avannaani miluumasut imarmiut pillugit Kommissionip, NAMMCO-mik taaneqartartup T-NASS-imik taaguuserlugu imaani miluumasunik kisitsinera naammassineqarpoq.
Allattoq Oline I. Olsen
oktobarip 02-at 2007 15:44

T-NASS Atlantikup avannarpasissuani nunanit arlariinnit suleqatigiinnikkut ingerlanneqarpoq, Kitaani Canadamiit Kangiani Ruslandimut peqataaffigineqarluni, kisitsiffigineqartorlu 3 millioni kvadratkilometerit missaanik isorartussuseqarpoq.

Arfernik kisitsinerup siunertaraa, arferit nunat killingi akorngoqquttaarlugit ingerlaartartut amerlassussaasa qanorlu agguataaqqanerisa ilisimasaqarfiginerulernissaat.

Nunatsinniit Pinngortitaleriffimmi ilisimatuut umiarsuarmit timmisartumiillu kisitseqataapput, arferillu kisitsinermi takuneqarsimasut tassaapput tikaagulliusaat, tikaagulliusaarnaq, tikaagullik, qipoqqarlu. Aamma takuneqarput arferit minnerit, tassa niisat, aarluarsuit, niisarnat, anarnallu.

Kisitsinermi paasisat maanna suliareqqissaarneqassapput, Atlantikullu Avannaani Miluumasut Imarmiut pillugit Kommissionimi (NAMMCOmi) Arfanniarnerlu pillugu ataatsimiititaliarsuarmi (IWC-imik taaneqartartumi) aappaagu ataatsimiinnissami saqqummiunneqassapput, kisitsisillu paasineqartut siunissami arfattassiisarnissani atorneqartassapput.