Arfernik ilisimatooq: Nunat killiit arferit ingasattumik pingaartippaat
Tikaagulliuasaaq Vejlep eqqaani tipimmat danskit alutorsaatigeqaat. Tupinnaqaarmi uumasupiluunersuarmik takujuitsuulluni, aamma ajunngilaq periarfissaq iluatsillugu alaatsinaakkaanni. Arfiuppata puisiuppataluunniit. Nunaniliuna killerni soorlu USA-mi Tuluit Nunaanni Australiami Hollandimilu imarmiunut upperisarsiortuusiinnalersut akueriuminaatsikkikka. Soorlumi Indiami nersussuit upperisarsiutigineqartartut ilaaginnaleraat.
Thyge Jensen isumaqarpoq pinngortitamik isiginnittarneq marloqiusanngortoq, tassa pinngortitaq kusanartutut qimerluugassatut isigiutigalugu nerisassarsiniaraangatta qerititsivimmiit tigusiinnartarluta. Taakkua marluk inuppassuarnit immikkoortinneqartalerput. Pinngortitaq tamaat eriagisassatut isigisariaqarparput, imaanngitsoq pinngortitap ilaannaa killilerlugu eriagisassatut isigiutigalugu, soorlu USA-mi taamaaliortuartut, taava pinngortitaq eriagisassatut killilerneqanngitsoq kemikalianik sorpajunnillu eqqaavigalugu aserorteraluaraanni soqutigissanagu. Uanga isumaqarpunga pinngortitaq tamarmi ataqqineqarluni eriagineqartariaqartoq. Eqqumiiginikuuara sooq arferit upperisarsiortuusilluni isigineqartalernersut. Ilimagaarali arferit uumasutut silatussusilittut oqaatiginiarneqartarnerat pisooqataassasoq. Taassumalli aamma saniatigut maanna arferit uumasoqatiminnik nalliginnissinnaasutut oqaatiginiarneqartalernerat pisooqataagunarpoq. Tamanna pissanganartutut isigineqarsinnaavoq, mannami tikillugu inuit kisiminik misiginneqataasinnaasutut isigineqartarmata. Isiginnaarutikkummi aallakaatitassiarpassuaqarpoq soorlu niisanut inunnik annaassisunut tunngasunik. Allaanngivippoq isummersuutit allariarlugit piviusut tassunga tulluarsarniarsarineqartartut. Tamakkua pissutaallutik arferit silatussuseqartutut isigineqartalerunarput, uangali naluara silatussuseqarnersut, Thyge Jensen naggasiivoq.
Thyge Jensen Aalisarnermut Immakkullu angallannermut katersugaasivimmi ukiorpassuarni atorfeqarpoq, 1977-imiillu aamma imarmiut miluumasut pillugit ilisimatusartuulluni.
Folketingimi Den Nordatlantiske Gruppe aqagu arfanniarneq puisinniarnerlu pillugit oqallitsitsilerpat Thyge Jensen akuliutissamaarpoq.
