Arferit tuukkamik toqunneqartarnerinik paasisat naalakkersuisut isertuuppaat
Islandimi aviisi Iceland Review nittartakkamini taama allaaserisaqarpoq.
Misissuineq Norgimiumit uumasut nakorsaanit aasaq manna siusinnerusukkut ingerlanneqartoq, Islandimi aalisarnermut ministeeriaqarfiup, Atlantikup Avannaani miluumasut imarmiut pillugit Kommissioni suleqatigalugu ingerlanneqarpoq.
Misissuinermi paasisat avammut saqqummiunneqarnissaat aallaqqaammut pilersaarutaagaluarpoq.
- Tamanna qularutissaanngitsumik tamanit soqutigineqarpoq, taamaattumik misissuinerup inerneranik soqutiginnittut paasitinneqarumaarput, Islandimi inatsisartuni Altingimi ukiormanna siusinnerusukkut oqallittoqarnerani aalisarnermut ministeri Sigurdur Ingi Jóhannsson taama oqarpoq.
Arfanniarnerup akuerineqarsinnaaneranut atatillugu oqallinnermi, arferup tuukkamit eqqorneqarneranit toqunissaanut piffissaq qanoq sivisutigisarnersoq qitiusumik oqallisaasimavoq.
Patsisaasinnaasumilli nalunaaruteqarani, Islandimi aalisarnermut nunalerinermullu ministerip misissuinerup inernera tamanut saqqummiukkusukkunnaaraa, aviisimi Iceland Review-mi allaaserineqarpoq.
