Arferit siku kimmut ingerlaaqatigisarpaat
Aalajangersimasumik periuseqarluni ukiuni 17-ni kisitsinerit takutippaat, arferit sikup kinguariarnera kimmut malikkaat, taamaammallu piniartut ukiormanna uumasunik nassaassaqanngillat, taama Pinngortitaleriffik nalunaarpoq.
Polar Research-imi allaaserisami nutaami biologit Pinngortitaleriffimmeersut nassuiaatigaat, qanoq qilalukkat qaqortat ukiisarfii sikunit sunnerneqartarneri.
Qilalukkat Kitaani ukiisarfiat aalajangersimasumik periuseqarluni timmisartumik 1981-ip 2008-llu akornanni quleriarluni kisitsiffigineqarsimavoq.
Timmisartukkut kisitsinerit arferit ikkannersuit suatungaaniinnerinik paasissutissiisarput, nalunarunnaarporlu arferit ukiuni sikoqarluarfiusuni, nunap qanittuani imarnersaniittartut.
Ukiuni sikoqarpianngitsuni arferit kimmut illuartarput ikkannersuillu qeqqiniittarlutik ilaatigullu ikkannersuit kimmut killinginiissinnaasarlutik.
Tamanna Kitaani ukiukkut qaqortanik qilalugartarineqartartut naatsorsornerannut sanilliukkaanni, ersarippoq ukiut sikoqarluarfiusut pisaqamalluarnarnerpaajusut. Tassa ukiuni arferit nunamut qaninneruffigisaanni piniartut angumasinnaasaanni. Tamatuma aamma nassuiarpaa Kitaani ukiuni kingullerni qaqortanik qilalugartat kinguariarsimanerat. Tassa sikoqarpiarsimanngimmat. Pisat kinguariarsimanerat qilalugaqatigiit qaqortat siuariaatigisimavaat uumasoqatigiillu annikitsumik siuariarsimapput maannalu arferit 10.500 missaanniilersimallutik.