Arferit piniagassatut pingaaruteqarneri nassuiaatigaat

Arfanniarnerup niiverutaalernissaanik akerliusut tamaasa Piniarnermi Aalisarnermilu pisortaqarfiup akissuteqarfigalugit allaffigeqqammerpai.

Sermitsiap allaaserisaa naapertussagaanni, allakkatigut akissutit naatsukullammik erseqqissumillu sooq nunarput Danmarkilu tamatumunnga akuersisimanersut allagaapput.

Ilaatigut allakkiami nassuiaatitaqarpoq maani nunami arferit piniagassatut qanoq pingaaruteqartigineri.

Allakkatigut akissutit akerliusunut tamanut nassiussuunneqassapput tuluttullu allassimasussaallutik.

Arfanniarnerup niiverutaanissaanik akuersisoqarmalli takornariaqarnermi inuussutissarsiornermilu siunnersuisooqatigiit qarasaasiaq aqqutigalugu e-mailikkut allakkat 1000-ilikkaat takkuttarsimapput. Oqaatigineqarporli akerliunerujussuaq maanna ingasappallaarunnaariartortoq. Allagarpassuit takkussuutiinnarmata ullormut allakkat 100-t missaat taamaallaat Namminersornerullutik Oqartussanut ingerlateqqinneqarsinnaasarsimasut, tuniniaanermi pisortaasup Niels Feerup-ip oqaatigaa.

Allakkat akerliusorpassuarnut akissutigineqartut uuma sapaatip-akunnerata ingerlanerani inuttaanut annguttussaasut oqaatigineqarpoq.