Politikki

Arferit pillugit isumartik allanngortippaat

Marlunngornermi ullaap tungaa matoqqamik nunanut allanut ministeri Folketingip avatangiisit pillugit ataatsimiititaliaanit isumasiorneqarpoq arfanniartarneq pillugu ataatsimiititaliarsuup IWCp ataatsimiinnissaanut piareersaatitut. Kalaallit Nunaat pillugu aamma Savalimmiut pillugit ataatsimiititaliat ilanngullugit qaaqquneqarput taamaasillutik atlantikup avannaani qinikkat folketingimilu ilaasortat isumasiuinermi peqataallutik.

Allattoq Peter Troelsen, Noah Mølgaard

juunip 13-at 2012 06:10

Ukiut kingulliit naalakkersuisut aalajangiusimajuarpaat pisuussutit uumassusillit aqunneqarnerat ilisimatuussutsikkut inassutit malillugit ingerlaneqassasoq. Tamanna nunanut allanut piumasaqarnissami nukittoqutaasoq Sara Olsvig oqarpoq.

- Isumaga anippara tassalu pisuussutit uumassusillit aqunneqarnerat ilisimatuussutsikkut ilisimasat tunngavigalugit ingerlanneqartariaqartoq. Atlantikup kujataani arfernik eqqissisimatitsiviliorniarnermut isuma ilisimatuussutsikkut paasisanik tunngaveqanngilaq taamaammat Naalagaaffeqatigiit isummersimanertik aalajangiusimajuartariaqarpaat tamannalu isuma erseqqissarpara, Folketingimut ilaasortaq Sara Olsvig (IA) oqarpoq.

Danmarkimi maanna naalakkersuisut partiillu naalakkersuisooqataasut siornatigut arfanniartarnermut akerliusuupput. Tamannali allanngorsimavoq. Tamanna Sara Olsvigip imatut paasivaa naalakkersuisut naalagaaffeqatigiit isumaannik ataqqinninnerattut.

- Naalakkersuisut nutaat atulitsiaannartut puisinniartarnermut arfanniartarnermullu tunngasut Folketingimi suleqatinnut nalunaarutigaakka. Maanna erseqqissumik paasinarsivoq assersuutigalugu SF siornatigut uumasunik illersuiniartuusoq allamik isummersimasoq tamannalu assut assut nuannaarutigaara, Sara Olsvig oqarpoq.

Arferit pillugit isumartik allanngortippaat

Aamma atuaruk