Arferit navianartorsiorput
Arferit aningaasatigut iluanaarutiginiarneqarnerinut sanilliullugu mingutsitsineq silaannaallu allanngoriartornera arfernut navianartorsiortitsineruvoq. Taama isumaqarput, Tasmaniami ilisimatusarfimmi ilisimatuut.
Nutaarsiassaqartitsiviup ABC Online-p tusarliussaa naapertorlugu ilisimatuut IWC misissuiffigisimavaat, Australiallu arfanniarnermut pisortatigoortumik akerliunera tunngavissaqarnersoq apeqquserlugu.
Tasmaniamiut ilisimatuut upperissagaanni Australiamiut tunngavilersuutaat pissutissaqanngitsutut nalilerneqarpoq. Australiamiummi akerliunerisa kingunerisaanik IWC marlunnut avissimavoq, tassalu arfanniarnermi illersuisut akerliusullu avissimalerlutik.
Taamalillunilu kommissionip ajornartorsiutivinnik suliaqarnissaraluanut tamanna akornusiivoq.
Soorlu mingutsitsinermut pisassarinngisanillu piniarnermut silaannallu allanngorneranut tunngatillugu.
Taamaattorli ilisimatuut taama nalunaaruteqaraluarmataluunniit Autraliami naalakkersuisut arfanniarnermut akerliunerminni allanngortitsiumanngillat.
