Arferit illersugaanerulissapput
Manerassuup kujasinnerusortaani arferit siunissami illersugaanerulissapput. Taqqavani nunat aqqanillit arfernik eqqissisimatitsivinnik pilersitsisinnaasunngorlutik aqagu isumaqatigiissusiussasut, Associated Pressimit allaaserineqarpoq.
Naalagaaffiit marluk arfanniartartunik avoqqaarinnittartut, Australien aamma New Zealand, isumaqatigiissusiornissaq siuttuuffigaat. Qeqertaaqqat, soorlu Fiji, Cookit qeqertaarai, Tonga, Samoa aamma Vanuatu atsioqataasussatut ilimagineqarput.
Newzealandimili eqqissisimatitsinermut ministeri, Chris Carter, oqarpoq japanimiut arfanniartarnerat taamatut isumaqatigiissusiornikkut unitsinneqarsinnaanngitsoq.
- Arfanniarneq pillugu ataatsimiititaliarsuaq imaallaat itsarnisaaruttorluni uninngaannaleruttorlunilu nutaamik soqutiginartumillu suliuniuteqalersinnaalerpoq, eqqissisimatitsiniarmut ministeri Chris Carter taama oqarpoq.
Aningaasarsiutigalugu arfanniartarneq ataatsimiititaliarsuarmit aasaq manna aqqutissiuunneqarpoq.
Taamatut aqqutissiuussinermi aalajangerneq Manerassuarmi najugalinnit avoqqaarineqaqaaq.
