Arferit Atlantikup avannarpasissuaniittut kiseqqissaarneqarnerat aallartinneqareerpoq.
Savalimmiormut kisitsinermut peqataapput, kisitsinissamullu atugassamik umiarsuarmik attartorsimallutik.
Arfernik ilisimasaqarluartunik arfineq-pingasunik umiarsuaq ilaasoqarluni qaammatip ataatsip ingerlanerani kisitsisoqassaaq.
Mikrofonit immap iluani atorneqarsinnaasut atortoralugit arferit aamma tusarnaarneqassapput. Mikrofoni 200 meteritut takitigisumik kabelilerneqassaaq, niisaat, anarnat kigutilissuillu amerlassusaat nalilerneqassallutik.
Imartaq misissuiffigineqartussaq annertoqaaq, tassa Savalimmiormiut imartaat, Islandillu nunattalu imartaani kisitsisoqassammat. Imartaq 2700 sømilinik takitigisoq misissuiffigineqassaaq.
Niisarnanik, tikaagulliusaanik anarnanillu maannamut takunnittoqarsimasoq, Savalimmiuni aalisarnermut pisortaqarfimmeersoq Kate Sanderson oqarpoq.
Komité-p Atlantikup avannaani miluumasut imarmiut pillugit Kommissionip, tassa NAMMCO-p ataaniittup kisitsineq aaqqissugaraa.
1982-imili kisitsisoqartalersimavoq, arferillu amerlassusaat NAMMCO-mi ilaasortanit ukiut arfineq-marlukkaarlugit nalilersorneqartarsimallutik.
NAMMCO-mi ilaasortat tassaapput Savalimmiut, Island, Kalaallit Nunaat aamma Norge.
Canada aamma Rusland ukioq manna aamma kisitseqataapput, imartarlu kisitsiffigineqartoq taamaalilluni annertusineqarluni.
- Arferit amerliartornersut amerliartunnginnersulluunniit paasiniarneqarpoq, imarmilu ilisimatusarnerit allat aqqutigalugit arfernik aamma kisitsoqarniarluni, Kate Sanderson oqarpoq.
Taanna 2004-mili NAMMCO-mi siulittaasuuvoq.
Arfernik kisitsineq 30-t aamma 40 millioni koruunit akornanni akeqarnissaa ilimagineqarpoq.
