Arferit Atlantikup avannaani aasaru kisinneqassapput

Arfernik Atlantikup avannarpasinnerusoortaani

kisitsinerit annertunersaat aasaru pissaaq.

Arferit Atlantikup avannaaniittut savalimmiormiunit, islandimiunit, kalaallinit norgemiunillu 1982-imili kisinneqartarsimapput, ukiut arfineq marluk allortarlugit.

Aasarulu kisitsineqaqqilerpat canadamiut russillu peqataaniarput. Tamatuma kingunerissavaa, arferit kisinneqarfiisa isorartussussiat annertunerussammat.

Arfernik kisitsinissaq Atlantikup avannaani miluumasut imarmiut pillugit ataatsimiititaliarsuup, tassa NAMMCO-p, ilisimatuussutsikkut ataatsimiititaliaata aaqqissuussaraa.

- Arferit amerlassusiisa nalilersorneqarnerata nutaamik suliarineqarnissaa, amerlisimasinnaaneranillu naliliinissaq, kisitsinermi siunertaavoq. Arfernik kisitsineq imaatigut ilisimatuussutsikkut suliaqartut allat suleqatigigalugit ingerlanniarneqassaaq, taama oqarpoq, Kate Sanderson, Savalimmiut sinnerlugit ukioq 2004-miilli NAMMCO-imi siulittaasuusoq.

Arfernik kisitsinissaq 30 - 40 millioni koruuunit akornanni akeqassangatinneqarpoq.