Arferit assortuussutaaqqilerput
Naak Kalaallit Nunaanni, Savalimmiuni Danmarkimilu naalakkersuisut tapersersuinatik isumaqatigiikkaluartut, Atlantikup kujasinnerusortaani arferit eqqissisimatitaaffeqalernissaannik siunnersuut aalassassimaarutaalerpoq. Naalakkersuisummi isumaat folketingimi ilaasortanit akerlilerneqarmat, Danmarkimi naalakkersuisut Arfanniarneq pillugu ataatsimiititaliarsuarmit siunnersuummut tapersersueqqullugit peqquneqarput.
- Ullormiit ullormut Danmarkimi naalakkersuisut folketingimi ilaasortaniit isummatta akerlianik iliuuseqaqquneqartassappata tamanna ajornartorsiutaavoq, Savalimmiuni nunanut allanut naallakkersuisoq, Högni Hoydal oqarpoq, taassuma aamma piumasaraa apeqqutini nunanut allanut tunngassuteqartuni Kalaallit Savalimmiormiullu qanoq pisinnaatitaaffeqarnerannik aalajangersaasoqassasoq, matumanimi pisoq kingulliunavianngimmat, Danmarkilli EU-mut pulajartuinnarnera ilutigalugu soqutigisat pisinnaatitaaffiillu aporaattuarnissaat naatsorsuutigisariaqarmat.
- Neriuppunga naalagaaffeqatigiikkatta pissutsit taamaaginnartussatut isigineqarunnaarlutik, aaqqiissutissanik ersarissunik maannangaaq Danskit periusissarsiulissasut. Kalaallit Savalimmiormiullu nunanut allanut tunngasunut sunniuteqarsinnaanerannik apeqqut aaqqiivigineqarsinnaavoq, Danskit politikeriisa piumassuseqarnerat apeqqutaaginnarpoq, Högni Hoydal oqarpoq.
Naalakkersuisut siulittaasuisa, Hans Enoksenip Jóannes Eideskovillu ministeriuneq, Anders Fogh Rasmussen ullumi ataatsimeeqatigaat.
