Arferit angisuut naalakkersuinikkut aalajangiiffigisassaapput

Kisianni tamatuma piviusunngortinneqarnissaa naalakkersuinikkut aalajangiiffigisassaasoq, NAMMCOp siulittaasua, Savalimmiormiu Kate Sanderson oqarpoq.

- NAMMCO pillugu isumaqatigiissummi, suleqatigiinnermi tunngaviusumi, miluumasut imarmiut ilaajuaannarput.

- Tamannami NAMMCOp qangaaniilli pisinnaatitaaffigaa. Qanoq pisassiisoqassanersoq naalakkersuinikkut aalajangerneqartarpoq. Aamma iliuuserineqartussat kommissionimi ilaasortanit tamarmiusunit isumaqatigiissutigineqaqqaartarput.

Kate Sanderson aperineqarami arfernik angisuunik pisassiisalerneq allaffissornikkut qanoq aqunneqassanersoq, akivoq maanna tamanna oqaaseqarfigissallugu siusippallaartoq. Tassami ataatsimiinnermi matumani apeqqut oqallisigineqassaaq, qanorlu angusaqartigissanersugut oqaatigiuminaappoq. Kissaatigineqartoq tamanit oqaluuseritikkusunneqarpoq. Qanorlu iliornissarput oqaluusereqqaartariaqarparput.

Kate Sanderson aperineqarami arfanniarneq pillugu ataatsimiititaliarsuaq nunarsuaq tamakkerlugu suleqatigiiffiummat suliassaasa ilaannik tigusinissaq unammillernartuunersoq, tamatumunnga akivoq, suliassaq ajornakusoortorujussuartut isiginngikkini, tassami NAMMCOp nunarsuup ilaani aalajangersimasumi suleqatigiiffiunera pingaartitaraarput, isumaqarlutalu arfernik pisassiisarneq aamma miluumasunik imarmiunik isumaginninneq nunarsuup ilaani tamakkoqarfiusuni aqunneqartariaqartoq, nunanit tamalaanit aqunneqarani. Tassami maannamut isumageriikkavut tassaapput, arferit puisillu Atlantikup Avannaani uumasuusut. Taamaattumik isumaqarpugut arfernik angisuunik aqutsineq nunanit tamalaanit aqunneqarani nunanit pineqartunit isumagineqartariaqartoq.

Aamma ullumi ataatsimiinneq amerlanerusunik arfattassinneqarusuttunit akerliussutsimik takutitsiffigineqarpoq.