Arferit angisuut arlallit siluusut
Sineriammiit 30 sømilit missaliorlugit avasissusilimmi arferit toquinnarsimallutik siluusut Attumi piniartut naammattoorpaat. Piniartut nassuiaatissaqartinngilaat qanoq ilillutik arfersuit taakku toqusimassanersut. - Ukiorpassuarni piniartuugaluarpunga kisianni arferit angisuut taama amerlatigalutik siluusut naammattoorsimanngilakka, piniartoq Gedion Karlsen arfernik takunnittut ilaat taama oqaluttuarpoq. - Takusinnaasavut malillugit ikinnerpaamik ataaseq kigutilissuuvoq ilaalu arferullutik mikinerit. 2 kilometerinik ungasitsigaagut qanilleriarsinnaanagillu sikut qaleriiaartut pissutigalugit, Gedion Karlsen taama oqaluttuarpoq. Piniartut takusatik allanartut oqaluuserisimavaat, taamaattorli toquinnarnerannut suna pissutaasimassanersoq nassuiaatissarsivinnagu. - Imaassinnaavoq ipiinnarsimassasut. Qanittumi tassaannarujussuaq sikugatta isip takusinnaasaa tamarmi avamut sikuinnarsuanngorluni, taama Gedion Karlsen oqarpoq.
