Arferit anaat pingaaruteqaqaat

Arferit anaat Sikuiuitsumi Kujallermi CO2-mik mingutsitsinermut akiuussutissatut pitsaalluinnarput.
Allattoq Elisa Isaksen
apriilip 27-at 2010 16:58

Arfernik ikilisaannginnertigut Sikuiuitsup Kujalliup imartaani CO2-mik mingutsitsineq minnerulissasoq, misissuinerup nutaap ersersippaa, tassami arferit anaat saviminermik akoqarluartut, uumasuaaqqanik immap ikerinnaaniittunik amerliartortitsilluartarmata. Nittartakkami ingeniøren.dk-mi taama allaaserinnittoqarpoq matumani Australiamiut misissuinerat nutaaq innersuussutigineqarluni.

Ilisimatuut suleqatigiit arferit soqqallit anaasa saviminermik akoqassusaat misissoqqissaarsimavaat, arferit pineqartut tassaallutik tunnullit, qipoqqaat aamma tikaagulliusaat.

Imaq arferit anaannik akulik, immamit anaqanngitsumit 10 millioneriaammik saviminermik akoqarneruvoq, imarlu saviminermik akoqanngitsoq immap ikerinnaaniittunik uumasuaraqannginnerulluni. Misiliilluni immamut tarajuusanik saviminertalinnik kuioraanikkut uumasuaqqat immap ikeraniittut amerleriartarnerat paasineqarpoq.

Nittartakkami ingeniøren.dk-mi oqaatigineqarpoq Australiamiut ilisimatuut isumaqartut, arferit arfanniartoqartalinnginneratut amerlassuseqaleqqippata, imaq saviminermik akoqarlualeqqissasoq taamalu uumasuaqqat immap ikeraniittut amerleqqippata, CO2 immap naqqanut kivisartoq minnerulissasoq.