Arferit amerlanerujussuit toqusimapput

University of British Columbia-mi ilisimatuut misissueqqinnerisa takutippaa arferit niisallu taamani toqusut siullermik naatsorsuutigineqartumiit 50-eriaammik amerlanerusimassasut. Uumasunik toqungasunik kisitseriaaseq pitsanngorsartariaqarpoq, ilisimatuussutsikkut misissuinermi siuttuusoq Rob Williams oqarpoq. Uumasut qassit sissamut tipineri naapertorlugit kisitsisoqartaraluarpoq, uumasorpassuilli avasissumi toqusut sissamut apuunneq ajorput. Exxon-Valdez 1989-imi ajutoormalli BP-p uuliasiorfiani ajutoortoqarmat aatsaat taama annertutigisumik mingutsitsisoqaqqippoq. Uuliasiorfik Deepwater Horizon siorna apriilip 22-anni qaartoormat, ullut tamaasa uulia nappartatut 53.000-itut annertutigisoq Mexicop kangerliumarnganut aniatinneqartarpoq. Qaammatit marluk qaangiummata uuliap aniaffia milinneqarmat aalisagarpassuit, timmiarpassuit, arferit niisallu toqoreersimapput kangerliumanerullu sineriaani annertuumik mingutsitsisoqareerluni.