Arferit 30-t toqungasut Alaskap sineriaanut tipisimasut
![](/sites/default/files/styles/image_934x467/public/article_images/hvaler_nooa.jpg?itok=EhL118oD)
Nutaarsiassaqartitsiviup International Business Timesip allaaserisaa naapertorlugu arferit 30-t toqungasut akornanni 14-it tassaapput qipoqqaat tikaagulliusaallu aqqanillit arferlu gråhvalimik danskisut taaneqartartoq ataaseq, sinnerilu suussusersineqarsinnaasimanatik.
Arferpassuit toqungasut siumorneqarnerat Immat silaannarlu pillugit USA-mi misissuisarfimmit NOAA-mit ernummatigineqarput, sunalu toqqutigisimaneraat qammaterpassuarni aatsaat paasiniaqqaarneqartariaqassagunartoq aviisip Washington Postip allaaseraa.
Perlerlutik napparsimanertilluunniit toqqutigisimasinnaagaat
Arferit sumik toqquteqarsimanersut eqqoriarneqaqattaarpoq. Perlerlutik napparsimanertilluunniit toqqutigisimagaat oqaatigineqarpoq, arferilli perlersimanerannik nappaateqarneranilli takussutissaqanngitsoq immikkut ilisimasallit oqaatigaat.
Silap pissusiata allanngoriartornera taamaammat pisooqataasinnaasoq maanna aamma eqqoriarneqarpoq, naak aamma oqartoqaraluartoq immat kissassusaat arferit uumanerannut sunniuteqangaarneq ajortut.
- Arferit taama amerlatigisut toqungallutik tamaani tipisimanerat ernumanarpoq. Naak suna pissutaanersoq suli paasinngikkaluaripput, misissuinerni inernerit aallaavigalugit arferit peqqissusaat ilisimasaqarfiginerulersinnaassavavut, uumaffiallu pillugu paasissutissanik annerusumik peqalissagunarluta, Terry Rowles, NOAA-meersoq oqarpoq.