Arferit 100-nit amerlanerusut Ruslandimi ungalukkiamiitinneqartut
Illoqarfik Nakhodka Ruslandip kangimut sineriaaniippoq, Kinamut killeqarfimmut 100 kilometerinik ungasitsigisumiilluni, Korea Avannarlermut aamma ungasinngitsumiilluni.
Arferit ungalukkiamiitsinneqarnerat, arferit pillugit immikkut ilisimasallip Carl Kinzep saqqummiuppaa, arferit "parnaarussiviattut" allaat taallugit.
Arferit pineqartut tassaapput qilalukkat qaqortat 90-it, aarluillu aqqanillit. Arferit taakku Kinamut tuniniarneqarnissaat siunertaralugu ungalukkiamiitsinneqartut ilimagineqarpoq, Kinami illoqarfissuarni inuit nuannaariartarfiini takusassiatut naatsorsuutigineqarlutik.
Aarluk ataaseq millionilikkaanik akeqarsinnaasarpoq.
Arferit inatsisinik unioqqutitsinikkut pisarineqarsimasuupput, Ruslandimilu suliffeqarfiit arfernik anngiortumik pisaqartarnerat oqartussanit misissuiffigineqaleruttorlutik.