Arfanniarneq pillugu ataatsimiititaliarsuup sapaatip-akunnerani tullermi ataatsimiinnissaa sioqqullugu Danmark Tuluit Nunaallu arfattassiisarneq pillugu aaqqiagiikkunnaarput.
Danmarkimi nunanut allamut ministeri Per Stig Møller Konservativineersoq tuluit aallartitaanik ullumi uparuaavoq, oqarluni ippassaq oqaaserisai ilumuunngilluinnartut, taama nutaarsiassaqartitsivik Ritzau allappoq.
Tuluit Nunaata ambassadøria David Frost Politikenimi allaaserisamini isumaqarnerarpoq, Danmarki arferit iluanaarniutigalugit piniarneqartarnerannut illersuinermigut, politikkimi apeqqummut pingaartumut atatillugu, ikinngutiminik sumiginnaasoq.
Taama oqarnera Per Stig Møllerip eqqunngilluinnarnerarpaa.
- Arfanniarneq pillugu ataatsimiititaliarsuarmi IWC-mi sulineq – nungusaataanngitsumik arfanniarnermik siunnersuisarnermik tunngaveqartoq – ambassadørip asuli uparuartuinermigut aserorsniarsaraa, oqarpoq.
Ambassadøri David Frost isumaqarpoq arferit tassaasut uumasut – angisuut, silatuut inuppalaartullu.
Per Stig Møllerili uparuaaqqippoq, oqarluni taama isummersortarnerup IWC-mi sulineq sequmissagaa.
- Pisariaqarpoq arfanniarsinnaanermut tunngatillugu malittarisassaqarnissaq. Tamannalu IWC-p suliaasa pingaartut ilagaat. Maleruaqqusaqangippammi arfanniarneq killeerutiinnarsinnaavoq, Per Stig Møller erseqqissaavoq.
Ataatsimiititaliarsuup iluanaarniutigalugu arfanniartarneq 1986-imi atorunnaarsikkarluaraa, nunat akuerisaallutik suli arfanniarsinnaatitaapput, soorlu Kalaallit Nunaat.
- Taanna ingerlaannaqqunaqaaq. Danmarkip nungusaataanngitsumik arfanniarneq tamakkiisumik illersorpaa, Per Stig Møller, Folketingip avatangiisinut ataatsimiititaliaani ataatsimeeqataareerluni tusagassiutinut oqarpoq.
Arfanniarneq pillugu ataatsimiititaliarsuup Alaskami Anchorage-imi ataatsimiinera sapaatip-akunnerata tulliani aallartissaaq.
